തിരുവനന്തപുരം: സംസ്ഥാനത്ത് ചെറിയ തുറമുഖങ്ങളിലെ തൊഴിലാളികൾക്ക് നൽകേണ്ട ഏ​റ്റവും കുറഞ്ഞ കൂലിനിരക്കുകൾ സർക്കാർ പുതുക്കി നിശ്ചയിച്ചു. പ്രതിദിനം അടിസ്ഥാന വേതനം (8 മണിക്കൂർ ജോലി) ക്ലാസ് എ വിഭാഗത്തിന് 763 രൂപയും ക്ലാസ് ബി 666 രൂപയും ക്ലാസ് സി 655 രൂപയും ക്ലാസ് ഡി 643 രൂപയും ക്ലാസ് ഇ 637 രൂപയുമായിരിക്കും. പീസ് റേ​റ്റ് വ്യവസ്ഥയിലോ ടണ്ണേജ് അടിസ്ഥാനത്തിലോ വേതനം നൽകുന്ന ഓരോ തുറമുഖത്തിന്റെയും കാര്യത്തിൽ 2011 മേയ് മൂന്നിലെ വിജ്ഞാപന പ്രകാരം ലഭിക്കാൻ അർഹതയുള്ള വേതനനിരക്കിൽ 40 ശതമാനം വർദ്ധനവ് പുതുക്കിയ വിജ്ഞാപനം പ്രാബല്യത്തിൽ വന്ന തീയതി മുതൽ നൽകണം. എന്നാൽ ഈ വിഭാഗം ജീവനക്കാർക്ക് ഈ വിജ്ഞാപനം പ്രകാരം നിശ്ചയിച്ച മിനിമം വേതന നിരക്കിൽ കുറയാത്ത വേതനം ലഭിക്കുന്നുണ്ടെന്ന് ഉറപ്പുവരുത്തണം. പുരുഷന്മാർക്ക് നൽകുന്ന വേതന നിരക്ക് തുല്യജോലിക്ക് സ്ത്രീതൊഴിലാളികൾക്കും നൽകണം.
ഇക്കണോമിക്‌​സ് & സ്​റ്റാ​റ്റിസ്റ്റിക്സ് വകുപ്പ് പ്രസിദ്ധീകരിക്കുന്ന ജീവിത നിലവാര സൂചികയിലെ പുതിയ സീരിസിലെ 280 പോയിന്റിനു മുകളിൽ വർദ്ധിക്കുന്ന ഓരോ പോയിന്റിനും 1.50 രൂപ ക്ഷാമബത്തയായി നൽകണം. മാസശമ്പളം നൽകുന്ന ജീവനക്കാർക്ക് 8 മണിക്കൂർ ജോലിക്ക് മുകളിൽ നിശ്ചയിച്ച പ്രകാരം അടിസ്ഥാന ശമ്പളവും ക്ഷാമബത്തയും കൂടിയുള്ള തുകയെ 26 കൊണ്ട് ഗുണിച്ചാൽ കിട്ടുന്ന തുക മാസശമ്പളമായി നൽകണം. ഏതെങ്കിലും വിഭാഗത്തിലെ ജീവനക്കാർക്ക് മുകളിൽ നിർദ്ദേശിച്ച മിനിമം വേതനത്തേക്കാൾ കൂടുതൽ വേതനമോ മ​റ്റേതെങ്കിലും ആനുകൂല്യമോ നിലവിൽ ലഭിക്കുന്നുണ്ടെങ്കിൽ അത് തുടർന്നും നൽകണം.