ആറ്റിങ്ങൽ: ആറ്റിങ്ങൽ ക്ലബ് അടിച്ചുതകർത്ത കേസിലെ രണ്ട് പ്രതികളെ പൊലീസ് അറസ്റ്റുചെയ്‌തു. ആറ്റിങ്ങൽ തോട്ടവാരം തുണ്ടുവിള വീട്ടിൽ ബിനു (39)​,​ തോട്ടവാരം പേരുവിള വീട്ടിൽ പ്രദീപ് (31)​ എന്നിവരാണ് പിടിയിലായത്. 18ന് രാത്രിയിലായിരുന്നു സംഭവം. ആറ്റിങ്ങൽ ക്ലബിന്റെ പിറകുവശത്തെ ഗ്രില്ല് പൊളിച്ച് അകത്തുകടന്ന അക്രമികൾ ക്ലബിന്റെ കോൺഫറൻസ് ഹാൾ,​ മറ്റു മുറികൾ,​ വാട്ടർ ടാപ്പുകൾ,​ സീലിംഗ് ഫാൻ,​ ഗ്രാനൈറ്റ് സ്ലാബുകൾ,​ ഗ്ലാസുകൾ എന്നിവ അടിച്ചുതകർത്തു. ഏകദേശം 5 ലക്ഷം രൂപയുടെ നഷ്ടമാണ് വരുത്തിയതെന്ന് പൊലീസ് പറഞ്ഞു. അക്രമം നടത്തിയ പ്രതികൾക്ക് സാരമായ പരിക്കേറ്റിരുന്നു. ആശുപത്രികളും മൊബൈൽ ഫോൺ നമ്പരുകളും പരിശോധിച്ചാണ് പ്രതികളെ ശാസ്ത്രീയമായി പിടികൂടിയത്. ആറ്റിങ്ങൽ ഡിവൈ.എസ്.പി ഫേമസ് വർഗീസിന്റെ നിർദ്ദേശ പ്രകാരം സി.ഐ വി.വി. ദീപൻ,​ എസ്.ഐ ശ്യാം എ.ജി,​ സലിം. എസ്,​ ഷിനോദ്,​ മഹേഷ്,​ താജുദ്ദീൻ,​ ഷാഡോ ടീം അംഗങ്ങളായ റിയാസ്,​ ജ്യോതിഷ് എന്നിവർ ഉൾപ്പെട്ട ടീമാണ് പ്രതികളെ അറസ്റ്റുചെയ്‌തത്.