മലയിൻകീഴ്: മാറനല്ലൂരിൽ കോൺഗ്രസ് പ്രവർത്തകരായ സഹോദരങ്ങളുടെ വീടുകൾക്ക് നേരെ ആക്രമണമുണ്ടായ സംഭവത്തിൽ ഒരാൾ പൊലീസ് കസ്റ്റഡിയിലെന്ന് സൂചന. ചൊവ്വാഴ്ച പുലർച്ചെയാണ് മാറനല്ലൂർ മഞ്ഞറമൂല സാഫല്യത്തിൽ ഷിബുവിന്റെയും മണ്ണടിക്കോണം ഹാപ്പി ഹൗസിൽ ടി. കുമാറിന്റെയും വീടുകൾക്കും വാഹനങ്ങൾക്കും നേരെ ആക്രമണമുണ്ടായത്. യുവാവിനെ കസ്റ്റഡിയിലെടുത്തതിനെക്കുറിച്ച് സ്ഥിരീകരണം നൽകാൻ പൊലീസ് തയാറായില്ല. ഇന്നലെ രാവിലെ 11ഓടെ നെടുമങ്ങാട് ഡിവൈ.എസ്.പി സ്റ്റുവർട്ട് കീലർ സംഭവ സ്ഥലം സന്ദർശിച്ചു. ഷിബുവിൽ നിന്നും കുമാറിൽ നിന്നും വിവരങ്ങൾ ശേഖരിച്ചു. സംഭവത്തിന് പിന്നിൽ രാഷ്ട്രീയമാണെന്ന് സ്ഥിരീകരിച്ചിട്ടില്ലെന്ന് ഡിവൈ.എസ്.പി പറഞ്ഞു. മൊബൈൽ ടവറും സമീപത്തെ സി.സി.ടി.വി ദൃശ്യങ്ങളും പൊലീസ് പരിശോധിച്ചു. നിർണായക വിവരങ്ങൾ ലഭിച്ചെന്നാണ് സൂചന. പ്രതികൾ ഉടൻ അറസ്റ്റിലാകുമെന്ന് ഡിവൈ.എസ്.പി സ്റ്റുവർട്ട് കീലർ പറഞ്ഞു.