കുളത്തൂർ: കുട്ടികൾക്കിടയിൽ ലഹരിയുടെ സ്വാധീനം വലിയ വെല്ലുവിളിയാണെന്ന് മന്ത്രി കടകംപള്ളി സുരേന്ദ്രൻ പറഞ്ഞു. ലഹരി വിരുദ്ധ ദിനാചരണത്തിന്റെ ഭാഗമായി ആക്കുളം എം.ജി.എം സ്‌കൂളിൽ സംഘടിപ്പിച്ച പ്രത്യക ലഹരിവിരുദ്ധ പ്രവർത്തനങ്ങളുടെ ഉദ്ഘാടനം നിർവഹിക്കുകയായിരുന്നു മന്ത്രി. തുടർന്ന് കുട്ടികളും അദ്ധ്യാപകരും ലഹരിവിരുദ്ധ പ്രതിജ്ഞയെടുത്തു. എം.ജി.എം ഗ്രൂപ്പ് ഒഫ് സ്‌കൂൾ ഡയറക്ടർ ആർ. സുനിൽകുമാർ, ഡയറക്ടർ പ്രൊഫ. മേജർ എസ്. വിജയകുമാർ, പ്രിൻസിപ്പൽ കൃഷ്‌ണ പി. നായർ, കെ.ജി വിഭാഗം കോ ഓർഡിനേറ്റർ ലിനു, പ്രൈമറി വിഭാഗം കോ ഓർഡിനേറ്റർ ശീതൾ, അദ്ധ്യാപകൻ ഷജീർ തുടങ്ങിയവർ സംസാരിച്ചു. എം.ജി.എം സെൻട്രൽ പബ്ലിക് സ്‌കൂളിലെ വിദ്യാർത്ഥികൾ തയ്യാറാക്കിയ ലഹരി വിരുദ്ധ തെരുവ് നാടകം പാളയം രക്തസാക്ഷി മണ്ഡപത്തിൽ എൻ.ആർ.ഐ സെൽ എസ്.പി എൻ. വിജയകുമാർ ഉദ്ഘാടനം ചെയ്‌തു.