തിരുവനന്തപുരം: ഹിന്ദുസ്ഥാൻ ന്യൂസ് പ്രിന്റ് ലിമി​റ്റഡ് ഏ​റ്റെടുക്കുന്നതിനുള്ള നടപടികൾ സംസ്ഥാന സർക്കാർ പരിശോധിക്കുകയാണെന്നും ഇതിന്റെ ഭാഗമായി വിശദമായ റിപ്പോർട്ട് സമർപ്പിക്കാൻ റിയാബിനോട് ആവശ്യപ്പെട്ടിട്ടുണ്ടെന്നും മന്ത്റി ഇ.പി ജയരാജൻ നിയമസഭയിൽ അറിയിച്ചു.
കേന്ദ്ര പൊതുമേഖലാ സ്ഥാപനമായ ഹിന്ദുസ്ഥാൻ പേപ്പർ കോർപ്പറേഷന്റെ സബ്‌സിഡിയറി യൂണി​റ്റായ കോട്ടയം എച്ച്.എൻ.എല്ലിന്റെ ഓഹരികൾ വി​റ്റഴിക്കാനുള്ള നടപടികൾ ആരംഭിച്ചപ്പോൾ തന്നെ സംസ്ഥാനം വിയോജിപ്പ് പ്രകടിപ്പിച്ചിരുന്നു. സംസ്ഥാന സർക്കാരിന് ഭൂമിയിലുള്ള അവകാശം കേന്ദ്രസർക്കാരിനെയും എച്ച്.പി.സിഎല്ലിനെയും അറിയിച്ചിട്ടുണ്ട്.
കേന്ദ്ര സർക്കാരിന്റെ നിലപാടിൽ ഒരു മാ​റ്റവും ഉണ്ടാകാത്ത സാഹചര്യത്തിൽ എച്ച്.എൻ.എല്ലിന്റെ ആസ്തി ഒരു രൂപ നിരക്കിൽ ഏ​റ്റെടുക്കാൻ തയ്യാറാണെന്ന് കാണിച്ച് കത്തയച്ചിരുന്നു. ഇതിനിടെ ഹോൾഡിംഗ് കമ്പനിയായ എച്ച്.പി.സി.എല്ലിന്റെ ലിക്യുഡേഷൻ ഉത്തരവ് നാഷണൽ ലാ ട്രിബ്യൂണൽ (എൻ.സി.എൽ.ടി) പ്രഖ്യാപിച്ചു. സംസ്ഥാന സർക്കാരും എൻ.സി.എൽ.ടി മുമ്പാകെ അപേക്ഷ സമർപ്പിച്ചിരുന്നുവെങ്കിലും ഇതിൽ സംസ്ഥാനം കക്ഷി അല്ലാത്തതിനാൽ അപേക്ഷ പരിഗണിക്കാതെ ഒഫിഷ്യൽ ലിക്വിഡേ​റ്ററെ നിയമിച്ചു. ഇത് ഏ​റ്റെടുക്കൽ നടപടിക്ക് തിരിച്ചടിയായി. എങ്കിലും ഔദ്യോഗിക ലിക്വിഡേ​റ്ററെ സമീപിച്ചോ കോടതി മുഖാന്തിരമോ എച്ച്.എൻ.എല്ലിനെ ലിക്‌വിഡേഷനിൽ നിന്ന് ഒഴിവാക്കി സ്ഥാപനത്തെ ഏ​റ്റെടുക്കാനുള്ള നടപടികളാണ് നടത്തുന്നതെന്നും മന്ത്റി പറഞ്ഞു.