തിരുവനന്തപുരം: പ്രവാസി വ്യവസായി സാജന്റെ ആത്മഹത്യയ്‌ക്ക് കാരണക്കാരിയായ ആന്തൂർ നഗരസഭാ അദ്ധ്യക്ഷ പി.കെ. ശ്യാമളയ്ക്കെതിരെ പ്രേരണാക്കുറ്റത്തിന് ക്രിമിനൽ കേസെടുക്കണമെന്ന് കെ.പി.സി.സി പ്രസിഡന്റ് മുല്ലപ്പള്ളി രാമചന്ദ്രൻ മുഖ്യമന്ത്രിയോട് ആവശ്യപ്പെട്ടു.

സാജന്റെ ഭാര്യ ബീന കെ.പി.സി.സി പ്രസിഡന്റിന് നൽകിയ നിവേദനത്തിന്റെ പശ്ചാത്തലത്തിൽ മുഖ്യമന്ത്രിക്ക് നൽകിയ കത്തിലാണ് മുല്ലപ്പള്ളി ആവശ്യം ഉന്നയിച്ചത്. ശ്യാമളയും ജീവനക്കാരും പ്രതികാരമനോഭാവത്തോടെ കംപ്ലീഷൻ സർട്ടിഫിക്കറ്റ് തടഞ്ഞുവയ്ക്കുകയായിരുന്നു.
നഗരസഭാ ചെയർപേഴ്സന്റെ കസേരയിൽ ഇരിക്കുന്നിടത്തോളം കാലം കംപ്ലീഷൻ സർട്ടിഫിക്കറ്റ് തരില്ലെന്ന് സാജനോടും മാനേജർ സജീവനോടും ശ്യാമള പറഞ്ഞിട്ടുണ്ട്. പി.കെ. ശ്യാമളയെ സംസ്ഥാന സർക്കാരും സി.പി.എമ്മും സംരക്ഷിക്കുന്നതും വെള്ളപൂശുന്നതും സാജന്റെ കുടുംബത്തോട് കാണിക്കുന്ന അനീതിയാണെന്ന് മുല്ലപ്പള്ളി കത്തിൽ ചൂണ്ടിക്കാട്ടി.