തിരുവനന്തപുരം: കേരള സർവകലാശാലാ സെനറ്റിലെ തിരഞ്ഞെടുപ്പിൽ വിദ്യാർത്ഥി പ്രതിനിധികൾക്കുള്ള പത്ത് സീറ്റിലും ഇടത് സ്ഥാനാർത്ഥികൾ വിജയിച്ചു. പത്തിൽ ഒമ്പത് സീറ്റും എസ്.എഫ്.ഐ വിജയിച്ചു. ഒരു സീറ്റ് എ.ഐ.എസ്.എഫ് നേടി. കഴിഞ്ഞ വർഷം എസ്.എഫ്.ഐക്ക് ഏഴും കെ.എസ്.യുവിന് മൂന്നും സീറ്റുകളുണ്ടായിരുന്നു. ശിജിത് ശിവസ് (മരുതൂർക്കോണം പി.ടി.എം കോളേജ് ഒഫ് എഡ്യൂക്കേഷൻ), രാഹുൽ രാജൻ (പാറശാല സി.എസ്.ഐ ഇൻസ്റ്റിറ്റ്യൂട്ട് ഒഫ് ലീഗൽ സ്റ്റഡീസ്), എ.എസ്. അനഘ (കാര്യവട്ടം കാമ്പസ്), എബി ഷിനു (ലാ അക്കാഡമി), എ.എ. അക്ഷയ് (മാവേലിക്കര ബിഷപ്മൂർ കോളേജ്), ആർ. കൃഷ്‌ണേന്ദു (കായംകുളം മിലാദ് ഇ ഷെരീഫ് മെമ്മോറിയൽ കോളേജ്), മുഹമ്മദ് യാസിൻ (ചേർത്തല ശ്രീനാരായണഗുരു കോളേജ് ഒഫ് അഡ്വാൻസ്ഡ് സ്റ്റഡീസ്), എസ്. നിതിൻ (കൊല്ലം മിലാദ് കോളേജ് ഒഫ് ടീച്ചർ എഡ്യൂക്കേഷൻ), യു. പവിത്ര (കായംകുളം മിലാദ് ഇ ഷെരീഫ് മെമ്മോമോറിയൽ കോളേജ്) എന്നിവരാണ് സെനറ്റിലേക്ക് തിരഞ്ഞെടുക്കപ്പെട്ട എസ്.എഫ്.ഐ സാരഥികൾ. ലാ അക്കാഡമി വിദ്യാർത്ഥി ആർ.രാഹുലാണ് എ.ഐ.എസ്.എഫ് പ്രതിനിധി. നേരത്തെ സർവകലാശാല യൂണിയനിലേക്കും എസ്.എഫ്.ഐ പാനൽ ഏകപക്ഷീയമായി തിരഞ്ഞെടുക്കപ്പെട്ടിരുന്നു. പത്തംഗ വിദ്യാർത്ഥി കൗൺസലിനെയും വെള്ളിയാഴ്ച തിരഞ്ഞെടുത്തു. സർവകലാശാലയിൽ നിന്ന് സെക്രട്ടറിയറ്റിലേക്ക് നടത്തിയ ആഹ്ലാദ പ്രകടനത്തിന് എസ്.എഫ്.ഐ സംസ്ഥാന പ്രസിഡന്റ് വി.എ. വിനീഷ്, സെക്രട്ടറി കെ.എം. സച്ചിൻദേവ്, എ.ഐ.എസ്.എഫ് സംസ്ഥാന സെക്റട്ടറി അരുൺ, എസ്.എഫ്.ഐ കേന്ദ്ര കമ്മിറ്റി അംഗങ്ങളായ അൻവീർ, ആദർശ് എം. ഷാജി എന്നിവർ നേതൃത്വം നൽകി.