 രക്തഗ്രൂപ്പുകൾ ഇനി വിരൽത്തുമ്പിൽ

മാരാരിക്കുളം: പഞ്ചായത്ത് പരിധിയിൽ 18നും 55നും മദ്ധ്യേ പ്രായമുള്ള, രക്തദാനത്തിന് തയ്യാറുള്ള മുഴുവൻ പേരുടെയും രക്തഗ്രൂപ്പ് അടങ്ങിയ ഡിജി​റ്റൽ ഡയറക്ടറി തയ്യാറാക്കി മാരാരിക്കുളം തെക്ക് ഗ്രാമപഞ്ചായത്തിന്റെ ശ്രദ്ധേയമായ ചുവടുവയ്പ്. അത്യാവശ്യ സമയത്ത് രക്തദാതാവിനെ പെട്ടന്ന് കണ്ടെത്താൻ പ്ലേ സ്റ്റോറിൽ 'റെഡ് ഡ്രോപ്പ്സ്' എന്ന പുതിയ ആപ്പും സജ്ജമാക്കി.

ഓരോ വാർഡിൽ നിന്നും 5 ആരോഗ്യ വോളണ്ടിയർമാരെ തിരഞ്ഞെടുത്ത് വിദഗ്ദ്ധ പരിശീലനം നൽകിയാണ് വിവരങ്ങൾ ശേഖരിച്ചത്. പഞ്ചായത്ത് പ്രദേശത്തുള്ള 49,000 പേരിൽ രക്തഗ്രൂപ്പ് അറിയാത്ത 4500 പേരെ കണ്ടെത്തി ആരോഗ്യ സബ്‌സെന്ററുകളിൽ രക്തഗ്രൂപ്പ് നിർണയ ക്യാമ്പും സംഘടിപ്പിച്ചു. വിവരങ്ങൾ മൊബൈൽ ആപ്ലിക്കേഷൻ വഴി ജനങ്ങൾക്ക് ലഭ്യമാക്കിയിരിക്കുന്നു. ഈ ആപ്ലിക്കേഷൻ പ്ലേസ്​റ്റോറിൽ നിന്നു ഡൗൺലോഡ് ചെയ്തെടുക്കാം. ആകെ 43,799 പേരുടെ വിവരങ്ങളാണ് ആപ്പ് വഴി ലഭ്യമാകുന്നത്. വൈസ് പ്രസിഡന്റ് എം.ജി.ലൈജുവാണ് പദ്ധതിയുടെ സൂത്രധാരൻ.
രക്തഗ്രൂപ്പ് ഡിജി​റ്റൽ ഡയറക്ടറിയുടെ പ്രകാശനം പാട്ടുകളം ഔവർ ലക്ഷം വീട് ആഡി​റ്റോറിയത്തിൽ മന്ത്റി ഡോ.ടി.എം. തോമസ് ഐസക്ക് നിർവ്വഹിച്ചു. പഞ്ചായത്ത് പ്രസിഡന്റ് ഇന്ദിര തിലകൻ അദ്ധ്യക്ഷത വഹിച്ചു. രക്തഗ്രൂപ്പ് ഡിജി​റ്റൽ ഡയറക്ടറിയുടെ മൊബൈൽ ആപ്ലിക്കേഷൻ സൗജന്യമായി വികസിപ്പിച്ചു നൽകിയ ടെക്ജെൻഷ്യ കമ്പനി പ്രതിനിധികളായ സാജൻ, ജിസ, സാനു, അഭിലാഷ് എന്നിവരെ ആദരിച്ചു . എം.ജി.ലൈജു, കല, കുഞ്ഞുമോൾ ഷാജി,ജയമോഹൻ, സി.ഡി.എസ് ചെയർപേഴ്‌സൺ ഷീല സുരേഷ് എന്നിവർ സംസാരിച്ചു. ചെട്ടികാട് ആർ.എച്ച്.​ടി.സി യിലെ ഡോ.ഹരികൃഷ്ണൻ പദ്ധതി വിശദീകരിച്ചു.ഹെൽത്ത് ഇൻസ്‌പെക്ടർ സാദിഖ് നന്ദി പറഞ്ഞു.