ചേർത്തല:ചാരായം വാ​റ്റിയ കേന്ദ്രം എക്‌സൈസ് റെയ്ഡ്‌ചെയ്തു. 10 ലി​റ്റർ ചാരായവും 70 ലി​റ്റർ കോടയും വാ​റ്റുപകരണങ്ങളുമായി ഒരാൾ പിടിയിൽ.സംഘത്തിലെ മൂന്നുപേർ ഓടിരക്ഷപ്പെട്ടു. ചേർത്തല മുനിസിപ്പൽ 33-ാംവാർഡിൽ കുറുപ്പംകുളങ്ങര കൊച്ചുകുളങ്ങര അരുൺകുമാർ(26) ആണ് പിടിയിലായത്. ഓടിരക്ഷപ്പെട്ടവരെ തിരിച്ചറിഞ്ഞുവെന്നും ഉടൻ അറസ്റ്റ്‌ചെയ്യുമെന്നും എക്‌സൈസ് അധികൃതർ പറഞ്ഞു. ചേർത്തല റേഞ്ച് ഓഫീസിൽ ലഭിച്ച രഹസ്യവിവരത്തിന്റെ അടിസ്ഥാനത്തിൽ കുറുപ്പംകുളങ്ങര രാജുവിന്റെ വീടിന്റെ ടെറസ് വെള്ളിയാഴ്ച പുലർച്ചെ റെയ്ഡ്‌ചെയ്യുമ്പോൾ സംഘം ചാരായം വാ​റ്റുകയായിരുന്നു. പാചകവാതകം ഉപയോഗിച്ചാണ് സ്റ്റൗ പ്രവർത്തിപ്പിച്ചത്.വാതക സിലിണ്ടർ,പാത്രങ്ങൾ, സ്റ്റൗ എന്നിവയും പിടിച്ചെടുത്തു. പതിവായി ചാരായംവാ​റ്റി മൊത്തവ്യാപാരം നടത്തുന്നവരാണ് പ്രതികളെന്ന് എക്‌സൈസ് പറഞ്ഞു. പിടിയിലായ അരുൺകുമാർ ഉൾപ്പെടെ പ്രതികൾ ക്രിമിനൽ കേസുകളിലെ പ്രതികളാണെന്ന് എക്സൈസ് അധികൃതർ പറഞ്ഞു. അരുൺകുമാറിനെ റിമാൻഡ്‌ചെയ്തു.