കുട്ടനാട്: സിമോദിന്റെ ജീവൻ നിലനിർത്താൻ എടത്വാ ഇന്ന് ഒന്നാകും. എടത്വ ഗ്രാമ പഞ്ചായത്ത് അഞ്ചാം വാർഡ് കരീശേരിൽ ഗോപിയുടെ മകനാണ് കെ.ജി. സിമോദ് (34). പെയിന്റിംഗ് ജോലിക്കി​ടെ രക്തസമ്മർദ്ദം കൂടി തലച്ചോറിലെ ഞരമ്പ് പൊട്ടി അതീവ ഗുരുതരാവസ്ഥയിൽ വൈക്കം ഇൻഡോഅമേരിക്കൻ ആശുപത്രിയിൽ ചികിത്സയിലാണ് സി​മോദ്.

അടിയന്തര ശസ്ത്രക്രി​യയ്ക്കായി പാവപ്പെട്ട ഈ കുടുംബം ഇപ്പോൾ തന്നെ ലക്ഷങ്ങൾ ചെലവഴിച്ചുകഴിഞ്ഞു. കൂടുതൽ ചെലവേറിയ അടിയന്തിര ശസ്ത്രക്രി​യ നടത്തിയെങ്കിലേ സിമോദിന്റെ ജീവൻ നിലനിർത്താൻ കഴിയൂ. അതിനായി ലക്ഷങ്ങൾ വേണ്ടിവരും.കൂലിപ്പണിക്കാരായ അച്ഛനും അമ്മയും ഭാര്യയും ഒരു മകനും അടങ്ങിയ നിർദ്ധന കുടുംബത്തിന് ഓപ്പറേഷന് വേണ്ടിവരുന്ന വലി​യ തുക കണ്ടെത്തുവാൻ കഴിവി​ല്ലെന്നതാണ് സ്ഥി​തി​.

ധനസമാഹരണം ഇന്ന്

ഈ സാഹചര്യത്തിൽ കെ.ജി. സിമോദ് ജീവൻ രക്ഷാ സമിതി രൂപീകരിച്ച് എടത്വ ഗ്രാമപഞ്ചായത്തിലെ മൂന്ന്, നാല്, അഞ്ച്, ആറ്, ഏഴ് വാർഡുകളിലാണ് ഇന്ന് ധനസമാഹരണം നടത്തുക. സമിതി രക്ഷാധികാരികളായ ഫാ. മാത്യു ചൂരവടി, അജയകുമാർ കരിശേരിൽ എന്നിവരുടെ നേതൃത്വത്തിലാണ് ധനസമാഹരണം.