കോലഞ്ചേരി: കടയിരുപ്പ് ആശുപത്രി ജംഗ്ഷനിലെ അപകട ക്രോസിംഗ് പരിഹരിക്കാൻ തീരുമാനമായതായി ജില്ലാ പഞ്ചായത്തംഗം ജോർജ് ഇടപ്പരത്തി അറിയിച്ചു. സിന്തൈറ്റ് ഗ്രൂപ്പാണ് പണം മുടക്കുന്നത്. മെയിൻ റോഡ് തൊട്ടുമുന്നിലുണ്ട് എന്നറിയിക്കാനുള്ള സ്പീഡ് ബ്രേക്കർ സംവിധാനമാണ് ഒരുക്കുന്നത്.

വളയൻചിറങ്ങര പീച്ചിങ്ങച്ചിറ റോഡും കോലഞ്ചേരി പട്ടിമറ്റം റോഡും സംഗമിക്കുന്ന കടയിരുപ്പ് ആശുപത്രി ജംഗ്ഷനിലെ ക്രോസിംഗിൽ കഴിഞ്ഞ ഒരു മാസമായി 25 അപകടങ്ങളാണ് നടന്നത്. ഇതേക്കുറിച്ച് കേരളകൗമുദി കഴിഞ്ഞദിവസം റിപ്പോർട്ട് ചെയ്തിരുന്നു. തുടർന്നാണ് നടപടി.

ക്രോസിംഗിൽ വരുന്ന നാലു റോഡുകളിലും സ്പീഡ് ബ്രേക്കർ സംവിധാനവും റിഫ്ളക്ട് ലൈറ്റുകളും സ്ഥാപിക്കും. ഇതിനുള്ള അനുമതി പൊതു മരാമത്ത് വകുപ്പ് നൽകിയിട്ടുണ്ട്. ഇതിന് രണ്ട് ലക്ഷത്തോളം രൂപ ചെലവുവരും.