കോലഞ്ചേരി: ആധുനിക നിലവാരത്തിൽ പള്ളിക്കര - മനയ്ക്കക്കടവ്, കിഴക്കമ്പലം - നെല്ലാട്, പട്ടിമ​റ്റം - പത്താംമൈൽ റോഡുകളുടെ പൂർത്തീകരണം ഇക്കൊല്ലം ഉണ്ടാകുമെന്ന പ്രതീക്ഷ മങ്ങി. വിവിധ വകുപ്പുകളുടെ ഏകോപനമില്ലായ്മയാണ് പാരയായത്. കിഫ്ബിയിൽ നിന്ന് 32.5 കോടി രൂപ അനുവദിച്ച് 22 കിലോമീ​റ്റർ ദൈർഘ്യത്തിലാണ് റോഡ് പുനർനിർമ്മിക്കുന്നത്. ആറുമാസം മുമ്പ് പൊതുമരാമത്ത് വകുപ്പ് മന്ത്രി ജി. സുധാകരനാണ് നിർമ്മാണോദ്ഘാടനം നിർവഹിച്ചത്.

# സമയബന്ധിതമായി പണി നടത്തുന്നില്ല

നിലവിൽ റോഡിന്റെ വീതികൂട്ടൽ പൂർത്തിയാക്കാനോ റോഡരികിലുള്ള കുടിവെള്ള പൈപ്പുകളും വൈദ്യുതി പോസ്റ്റുകളും മാ​റ്റി സ്ഥാപിക്കാനോ ബന്ധപ്പെട്ട വകുപ്പുകൾക്കായിട്ടില്ല. കാന നിർമ്മാണം പലയിടത്തും പാതിവഴിയിലാണ്. ഇതിനെല്ലാമുള്ള ചെലവ് യഥാസമയം അതത് വകുപ്പുകൾക്ക് നൽകിക്കഴിഞ്ഞിട്ടും ഇതാണ് അവസ്ഥ. റോഡ് വികസനത്തോടൊപ്പം ബസ് ബേ നിർമ്മാണം, കലുങ്കുകൾ മാ​റ്റി സ്ഥാപിക്കൽ എന്നിവയും നടത്തണം. എന്നാൽ സമയബന്ധിതമായി പണി നടത്താൻ ഉദ്യോഗസ്ഥർ ശ്രമിക്കുന്നില്ലെന്ന പരാതി വ്യാപകമാണ്.

# മഴയെത്തി പണി നിർത്തി

റോഡ് ബി.എം.ബി.സി നിലവാരത്തിലാക്കാനാണ് കരാർ നൽകിയിട്ടുള്ളത്. ഉമ്മൻചാണ്ടി സർക്കാർ 25 കോടി രൂപയായിരുന്നു ആദ്യം അനുവദിച്ചത്. ഇത് പിന്നീട് 32.5 കോടി രൂപയാക്കി എൽ.ഡി.എഫ് സർക്കാർ വർദ്ധിപ്പിച്ചു. പട്ടിമ​റ്റം കനാൽ പാലം വീതി കൂട്ടുന്നതടക്കമുള്ള ജോലി തീരാനുണ്ട്. മഴ വീണ്ടും തുടങ്ങിയതോടെ പണികൾ തത്കാലം നിർത്തി. ഇനി എന്ന് തുടങ്ങും. അധികാരികൾക്ക് മിണ്ടാട്ടവുമില്ല.