കിഴക്കമ്പലം: പട്ടിമറ്റത്ത് വിദ്യാർത്ഥികളെ സ്വകാര്യ ബസിൽ കയറ്റുന്നില്ലെന്ന് പരാതി. പട്ടിമറ്റം മാർ കൂറിലോസ് സ്‌കൂളിലെ വിദ്യാർത്ഥികളാണ് പരാതി​ക്കാർ. കഴിഞ്ഞദിവസം വിദ്യാർത്ഥികളെ കയറ്റാതെ പാഞ്ഞ മൂവാറ്റുപുഴ ആലുവ റൂട്ടിൽ സർവീസ് നടത്തുന്ന ബസിനെതിരെ വി​ദ്യാർത്ഥി​കൾ പൊലീസ് സ്‌റ്റേഷനിൽ നേരിട്ടെത്തി പരാതി പറഞ്ഞിരുന്നു. പരാതി​ എഴുതി​ക്കൊടുത്ത വി​ദ്യാർത്ഥി​കളെ ബസ് ജീവനക്കാർ ഭീഷണി​പ്പെടുത്തി​. സ്‌കൂളിൽ നിന്ന് ഏകദേശം ഒന്നര കിലോമീറ്ററോളം നടന്നാണ് വിദ്യാർത്ഥികൾ സ്‌കൂളിനടുത്തുള്ള ബസ് സ്റ്റോപ്പിലെത്തുന്നത്. എന്നാൽ ഇവിടെ ബസുകൾ നിർത്താതിനാൽ പിന്നെയും അര കിലോമീറ്ററിലേറെ നടന്ന് പട്ടിമറ്റം ജംഗ്ഷനിൽ എത്തിയാണ് ബസിൽ കയറുന്നത്. റോഡ് മോശമായതി​നാലും ബസി​ൽ നി​റയെ വി​ദ്യാത്ഥി​കൾ ഉൾപ്പെടെയുള്ള യാത്രക്കാരുടെ തി​രക്കുള്ളതി​നാലും സമയത്ത് ഓടി​യെത്താൻ കഴി​യുന്നി​ല്ല. അതി​നാലാണ് എല്ലാ സ്റ്റോപ്പി​ലും നി​റുത്താനാകാത്തതെന്ന് ബസ് ജീവനക്കാർ പറയുന്നു.