മൂവാറ്റുപുഴ: നഗരത്തിലെ പ്രധാന ബൈപ്പാസ് റോഡുകളിലൊന്നായ ഇ.ഇ.സി മാർക്കറ്റ് ബൈപ്പാസിലൂടെ യാത്രചെയ്യാൻ വാഹനയാത്രക്കാരും കാൽനടക്കാരും ഏറെ വിഷമിക്കുന്നു. റോഡിന്റെ ഇരുവശങ്ങളും ടാർ മിക്‌സിംഗ് യന്ത്രങ്ങളും പൊളിക്കാനുള്ള വാഹനങ്ങളും നാഷണൽ പെർമിറ്റ് ലോറികളും അടക്കമുള്ള വാഹനങ്ങൾ കൈയടക്കിയതോടെ ഇതിലൂടെ കാൽനടയാത്ര പോലും ദുസഹമായി.
നഗരത്തിലെ തിരക്കുകൾ ഒഴിവാക്കി കോതമംഗലം ഭാഗത്തുനിന്നും വരുന്ന വാഹനങ്ങളും എറണാകുളം, പെരുമ്പാവൂർ ഭാഗത്തുനിന്നു വരുന്ന വാഹനങ്ങളും പ്രധാനമായും ആശ്രയിക്കുന്നത് ഈ ബൈപ്പാസ് റോഡിനെയാണ്. പ്രധാനപ്പെട്ട റോഡിൽപ്പോലും അനധികൃത പാർക്കിംഗ് വ്യാപകമായിട്ടും അധികാരികൾ നടപടിയെടുക്കുന്നില്ല.
# അനധികൃത പാർക്കിംഗ്
ഒരു വർഷത്തോളമായി ഇവിടെ നമ്പർ പോലുമില്ലാത്തൊരു കാർകൊണ്ടുവന്ന് തള്ളിയിട്ടിട്ടുണ്ട്. ടാർ മിക്‌സിംഗ് യന്ത്രവും റോഡരികിൽ കിടക്കാൻ തുടങ്ങിയിട്ട് മാസങ്ങളായി. വിവിധ പ്രദേശങ്ങളിൽ ലോഡ് കയറ്റുന്നതിനായി എത്തുന്ന നാഷണൽ പെർമിറ്റ് ലോറികളും ഇവിടെ നിരത്തി പാർക്ക് ചെയ്യുന്നു. വിവിധ സ്ഥലങ്ങളിൽ ജോലിക്കെത്തുന്നവരുടെ കാറുകളും ഇരുചക്രവാഹനങ്ങളും പാർക്കുചെയ്യുന്നത് ഇവിടെയാണ്.
# കാൽനടയാത്രയും അസാദ്ധ്യം
ഇരു ഭാഗത്തുനിന്നും വാഹനങ്ങൾ ഒരുമിച്ചെത്തിയാൽ റോഡിൽ ഗതാഗത തടസം ഉറപ്പാണ്. റോഡിലെ അനധികൃത പാക്കിംഗ് മൂലം ഏറ്റവും ദുരിതമനുഭവിക്കുന്നത് കാൽനടയാത്രക്കാരാണ്. റോഡിന്റെ ഇരുഭാഗങ്ങളിലും വാഹനങ്ങൾ പാർക്ക് ചെയ്യുന്നതിനാൽ റോഡിലൂടെ ഇറങ്ങി നടക്കേണ്ട അവസ്ഥയാണ്. ഏതുസമയത്തും അപകടമുണ്ടാകാനുള്ള സാദ്ധ്യത കാരണം കാൽനടക്കാർ വിഷമിക്കുന്നു. ഇ.ഇ.സി മാർക്കറ്റ്, സ്‌കൂൾ, മസ്ജിദ് അടക്കം നിരവധി സ്ഥാപനങ്ങൾ ഇവിടെ സ്ഥിതിചെയ്യുന്നു. ഇവിടേക്ക് എത്തേണ്ടവരും ദുരിതത്തിലാണ്.
# നടപടി വേണം
ബൈപ്പാസ് റോഡിലെ ദുരിതം തീർക്കാൻ ബന്ധപ്പെട്ട വകുപ്പ് ഉദ്യോഗസ്ഥർ നടപടി സ്വീകരിക്കണമെന്ന ആവശ്യം ശക്തമാണ്.