കൊച്ചി: ചേരാം ചേരാനെല്ലൂരിനൊപ്പം തണൽ ഭവനപദ്ധതിയിലെ 19 ാംമത്തെ വീട് കൈമാറി. ഇതോടെ പ്രളയാനന്തരം ചേരാനല്ലൂർ പഞ്ചായത്തിൽ ദുരിതാശ്വാസ ക്യാമ്പിൽ കഴിഞ്ഞ അവസാനത്തെ കുടുംബവും പുതിയ ഭവനത്തിലേക്ക് മാറി. ഹൈബി ഈഡൻ എം.പിയും ഭാരതീയ വിദ്യാഭവൻ ഡയറക്ടർ ഇ. രാമൻകുട്ടിയും കോ ഓർഡിനേറ്റർ ജി.കെ പിള്ളയും ചേർന്ന് താക്കോൽദാനം നടത്തി. ചടങ്ങിൽ ഇടപ്പള്ളി ബ്ലോക്ക് പഞ്ചായത്ത് പ്രസിഡന്റ് എം.ആർ ആന്റണി, ചേരാനല്ലൂർ പഞ്ചായത്ത് പ്രസിഡന്റ് സോണി ചീക്കു, മെമ്പർ കെ.പി ഷീബ തുടങ്ങിയവർ പങ്കെടുത്തു.
ചേരാനല്ലൂർ പഞ്ചായത്തിലെ 12 ാം വാർഡിൽ താമസിക്കുന്ന സുശീല കാർത്തികേയന്റെ ഭവനമാണ്‌ നിർമ്മിച്ച് നൽകിയത്. ഭാരതീയ വിദ്യാഭവനാണ്‌ സ്പോൺസർ. പ്രളയത്തിൽ ഇവരുടെ പൂർണമായും തകർന്ന് വാസയോഗ്യമല്ലാതായി. ചേരാനല്ലൂർ ഗ്രാമപഞ്ചായത്തിൽ സജ്ജമാക്കിയിരുന്ന ദുരിതാശ്വാസ ക്യാമ്പിൽ നിന്നാണ്‌ സുശീലയും കുടുംബവും പുതിയ വീട്ടിലേക്കെത്തുന്നത്.
520 ചതുരശ്ര അടി വിസ്തീർണത്തിൽ രണ്ട് കിടപ്പുമുറികളും അടുക്കളയും സ്വീകരണമുറിയും ടോയ്‌ലെറ്റും അടങ്ങിയതാണ്‌ പുതിയ ഭവനം. തണൽ ഭവനപദ്ധതിയുടെ ഭാഗമായി ഇതിനകം 34 വീടുകൾക്ക് തറക്കല്ലിട്ടതായി ഹൈബി ഈഡൻ എം.പി പറഞ്ഞു.