കൊച്ചി: കേരള മീഡിയ അക്കാഡമിയുടെ 2018 ലെ മാദ്ധ്യമ അവാർഡുകൾക്ക് അപേക്ഷ ക്ഷണിച്ചു. 2018 ജനുവരി ഒന്നു മുതൽ ഡിസംബർ 31 വരെ മാദ്ധ്യമങ്ങളിൽ പ്രസിദ്ധീകരിച്ച റിപ്പോർട്ടുകളാണ് പരിഗണിക്കുന്നത്. ദിനപ്പത്രങ്ങളിലെ മികച്ച എഡിറ്റോറിയലിനുള്ള വി.കരുണാകരൻ നമ്പ്യാർ അവാർഡ്, മികച്ച അന്വേഷണാത്മക റിപ്പോർട്ടിനുള്ള ചൊവ്വര പരമേശ്വരൻ അവാർഡ്, മികച്ച പ്രാദേശിക ലേഖകനുള്ള ഡോ. മൂർക്കന്നൂർ നാരായണൻ അവാർഡ്, മികച്ച ഹ്യൂമൻ ഇന്ററസ്റ്റ് സ്റ്റോറിക്കുളള എൻ.എൻ.സത്യവ്രതൻ അവാർഡ്, മികച്ച ന്യൂസ് ഫോട്ടോഗ്രാഫർക്കുള്ള അക്കാഡമി അവാർഡ്, ദൃശ്യമാദ്ധ്യമ രംഗത്തെ മികച്ച പ്രവർത്തനത്തിനുള്ള അക്കാഡമി അവാർഡ് എന്നിവയിലേക്കാണ് അപേക്ഷ ക്ഷണിച്ചത്. റിപ്പോർട്ടിൽ/ഫോട്ടോയിൽ ലേഖകന്റെ/ഫോട്ടോഗ്രാഫറുടെ പേര് ഇല്ലെങ്കിൽ സ്ഥാപന മേലധികാരിയുടെ സാക്ഷ്യപത്രം ഹാജരാക്കണം. ഒരാൾക്ക് പരമാവധി മൂന്ന് അപേക്ഷകൾ അയയ്ക്കാം. അപേക്ഷയുടെ ഒരു ഒറിജിനലും മൂന്ന് കോപ്പികളും സഹിതം ആഗസ്റ്റ് 10 ന് വൈകിട്ട് അഞ്ചിനകം സെക്രട്ടറി, കേരള മീഡിയ അക്കാഡമി, കാക്കനാട്, കൊച്ചി - 682030 എന്ന വിലാസത്തിൽ ലഭിക്കണം. കവറിനുപുറത്ത് ഏത് വിഭാഗത്തിലേക്കാണെന്ന് രേഖപ്പെടുത്തണം. ഫോട്ടോകൾ 10-8 വലിപ്പത്തിൽ പ്രിന്റുകൾ നൽകണം.

2018 ലെ ദൃശ്യമാദ്ധ്യമ പ്രവർത്തകനുള്ള അവാർഡിന് പ്രേക്ഷകർക്കും പേര് നിർദ്ദേശിക്കാം. ഏതു മേഖലയിലെ ഏതു പ്രോഗ്രാമാണ് ശുപാർശ ചെയ്യുന്നതെന്ന് രേഖപ്പെടുത്തണം. അക്കാഡമിയുടെ വിലാസത്തിലോ keralamediaacademy.gov @gmail.com എന്ന ഇ-മെയിലിലോ ശുപാർശ അയയ്ക്കാം. ഫലകവും 25,000 രൂപയും പ്രശസ്തി പത്രവുമാണ് പുരസ്‌കാരം.