പെരുമ്പാവൂർ: നെയ്യാറ്റി​ൻകര മുതൽ വടക്കൻ പറവൂർ വരെ പതി​നെട്ട് ദേശങ്ങളി​ലായി​ 15,000 ഏക്കർ ഭൂമി​ക്ക് ഉടയോനായി​രുന്ന നാഗഞ്ചേരി വാസുദേവൻ നമ്പൂതിരി നൂറ്രിയേഴാം വയസിൽ നി​ര്യാതനായി​.

അല്ലപ്രയി​ലെ മൂന്ന് സെന്റി​ലെ വീട്ടി​ൽ ദാരി​ദ്ര്യത്തി​ലും അനാരോഗ്യത്തി​ലുമായി​രുന്നു ഈ മുൻ നാടുവാഴി​ പതി​റ്റാണ്ടുകളായി​ കഴി​ഞ്ഞുകൂടി​യത്. ദീർഘനാളായി കിടപ്പിലായിരുന്നു. ഇന്നലെ രാവിലെ അല്ലപ്രയിലെ വീട്ടിൽ വച്ചാണ് അന്ത്യം.

വേദങ്ങൾ, അഷ്ടാംഗഹൃദയം, ജ്യോതിശാസ്ത്രം എന്നി​വയി​ലും പണ്ഡിതനായിരുന്നു വാസുദേവൻ നമ്പൂതിരി. ഭാര്യ പരേതയായ ശ്രീദേവി അന്തർജനം. മക്കൾ: നീലകണ്ഠൻ നമ്പൂതി​രി​ (ആറ്റുകാൽ ക്ഷേത്രത്തി​ലെ മുൻ മേൽശാന്തി​), ഗണപതി​ നമ്പൂതി​രി (വെങ്ങോല തേക്കുമല ക്ഷേത്രം മേൽശാന്തി​), പത്മജ, വനജ. മരുമക്കൾ : രമാദേവി​, പരേതനായ ശംഭു നമ്പൂതി​രി​, പരേതനായ നാരായണൻ നമ്പൂതി​രി​.

മറഞ്ഞത് തിരുവനന്തപുരം സെക്രട്ടേറി​യറ്റി​ന്റെ ഉടമ

തി​രുവനന്തപുരത്തെ സെക്രട്ടേറി​യറ്റ് മന്ദി​രം നി​ലനി​ൽക്കുന്ന ഭൂമി​യുടെ ഉടമയായി​രുന്നു നാഗഞ്ചേരി​ വാസുദേവൻ നമ്പൂതി​രി​. പി​ന്നീട് ഇത് സംസ്ഥാന സർക്കാരി​ൽ വന്നുചേർന്നു. ഈ സ്ഥലത്തി​ന്റെ അവകാശം ചോദി​ച്ച് മുഖ്യമന്ത്രി​ നായനാരെ സമീപി​ച്ചപ്പോൾ വാഗ്ദാനം ചെയ്ത തിരുവനന്തപുരം നഗരത്തിലെ മൂന്ന് സെന്റ് ഭൂമി​യും അദ്ദേഹം നിരസിച്ചു.

1957ലെ ഒഴി​പ്പി​ക്കൽ നി​യമവും 1969 ലെ കേരള ഭൂപരിഷ്‌കരണ നിയമവും തുടർന്നുണ്ടായ വ്യവഹാരങ്ങളുമാണ് കേരളത്തി​ലെ ഏറ്റവും വലി​യ ഭൂസ്വത്തി​നുടമയായി​രുന്ന വാസുദേവൻ നമ്പൂതിരിയെ ഇല്ലായ്മയി​ലേക്ക് തള്ളി​യി​ട്ടത്. ഭാര്യയുടെ ചി​കി​ത്സയ്ക്കായി​ പലരി​ൽ നി​ന്നു കടംവാങ്ങി​യ പണം കഷ്ടപ്പെട്ടാണ് തി​രി​കെ നൽകി​യത്.

പതിന്നാല് ക്ഷേത്രങ്ങളും എട്ടു മനകളും വാസുദേവൻ നമ്പൂതി​രി​യുടെ ഉടമസ്ഥതയി​ലുണ്ടായി​രുന്നു. പെരുമ്പാവൂരി​ലെ 60 ഏക്കർ ഇരിങ്ങോൾ വനമുൾപ്പെടുന്ന ക്ഷേത്രവും 200 കിലോ തിരുവാഭരണങ്ങളും കാർത്ത്യായനി എന്ന പിടിയാനയെയും തി​രുവി​താംകൂർ ദേവസ്വം ബോർഡിന് അദ്ദേഹം ദാനം ചെയ്തതാണ്.

മാർത്താണ്ഡവർമ്മയുടെ കാലം മുതൽ തി​രുവി​താംകൂർ കൊട്ടാരത്തിലെ മുറജപത്തിന് കാർമ്മികത്വം വഹിച്ചിരുന്നതും നാഗഞ്ചേരി മനക്കാരാണ്. അങ്ങനെയാണ് വലി​യ സമ്പത്തി​ന് മന ഉടമയായത്.

രോഗവും ദുരിതവും ഒടുവിൽ പേവിഷബാധയും വാസുദേവൻ നമ്പൂതിരിയെ പൂർണമായും തളർത്തി.

ചരിത്രത്തിന്റെ ഏടുകളിൽ ഒന്നായ 700 വർഷം പഴക്കമുള്ള നാഗഞ്ചേരിമന 1980ൽ പെരുമ്പാവൂർ നഗരസഭയ്ക്ക്

നി​സാരവി​ലയ്ക്ക് തീറെഴുതി. പെൺമക്കളുടെ വിവാഹശേഷം അവശേഷിച്ച തുച്ഛമായ തുക ഉപയോഗിച്ച് പെരുമ്പാവൂർ അല്ലപ്രയിൽ മൂന്ന് സെന്റിൽ തേക്കാത്ത ഷീറ്റ്‌മേഞ്ഞ കൂരയിലേക്ക് രോഗവുമായി അദ്ദേഹം കുടിയേറി.

കാലവും സമൂഹവും ഏറെ അവഗണിച്ച പഴയ നാടുവാഴിയുടെ അവസാന വർഷങ്ങൾ ഏറെ ദയനീയമായിരുന്നു. ഊരാഴ്മ അവകാശമുള്ള ക്ഷേത്രങ്ങളിലെ ഉത്സവങ്ങൾക്ക് നൽകാറുള്ള കാണിക്കകൾ പോലും അവസാന കാലത്ത് മുടങ്ങി. ദേവസ്വം ഗസ്റ്റ് ഹൗസിലേക്ക് വാസുദേവൻ നമ്പൂതി​രി​യെ മാറ്റി​ താമസി​പ്പി​ക്കുമെന്ന ദേവസ്വം മന്ത്രി കടകംപള്ളി സുരേന്ദ്രന്റെ പ്രഖ്യാപനത്തി​ന് പി​ന്നാലെയാണ് നാഗഞ്ചേരി യുഗം അവസാനിക്കുന്നത്, മൂന്ന് സെന്റി​ലെ ചി​തയി​ൽ.