പാലാ: കേരള പൊലീസ് അസോസിയേഷന്റെ മുപ്പത്തിയഞ്ചാം ജില്ലാ സമ്മേളനത്തിന്റെ ഭാഗമായി നാളെ പാലായിൽ നടക്കുന്ന ചടങ്ങിൽ 35 ചലച്ചിത്ര, നാടക ഗാനങ്ങൾ തുടർച്ചയായി ആലപിക്കാനുള്ള തയ്യാറെടുപ്പിലാണ് പാലായിലെ ട്രാഫിക് പൊലീസുകാരനായ എസ്.സുദേവ്. നാളെ 2.30 ന് പാലാ മുനിസിപ്പൽ ടൗൺ ഹാളിൽ നടക്കുന്ന സുദേവിന്റെ ഗാനാർച്ചന മൂന്നു മണിക്കൂറോളം നീളും. ഇതിനായി അവധിയെടുത്ത് രണ്ട് ദിവസത്തെ പരിശീലനത്തിലായിരുന്നു സുദേവ്. നാളെ പാടുന്നതിലേറെയും പഴയ മെലഡികളാണ്.

കഴിഞ്ഞ 11 വർഷമായി കോട്ടയം ജില്ലാ പൊലീസ് ഓർക്കസ്ട്രയിലെ പ്രമുഖ ഗായകനായ ഇദ്ദേഹം ഇപ്പോൾ ട്രൂപ്പിന്റെ കോ ഓർഡിനേറ്ററാണ്. ഒരേ പാട്ടിൽ സ്ത്രീയുടെയും പുരുഷന്റെയും ശബ്ദത്തിൽ ആലപിച്ചും ശ്രദ്ധേയനായിരുന്നു ഈ 44കാരൻ. ജില്ലാ പൊലീസ് ഓർക്കസ്ട്രയുമായി അഞ്ഞൂറോളം വേദികളിൽ ഗാനമേള അവതരിപ്പിച്ചിട്ടുണ്ട്.

കിടങ്ങൂർ ചെമ്പിളാവ് കുന്നേൽ കരോട്ട് കുടുംബാംഗമാണ്. ഷീജയാണ് ഭാര്യ. ദേവപ്രിയ, ദീപക് ദേവ് എന്നിവർ മക്കളും. പാലാ ട്രാഫിക്ക് പൊലീസിലെ റൈറ്ററാണ് സുദേവ്.
പൊലീസ് അസോസിയേഷൻ ജില്ലാ സമ്മേളനം ഏറ്റുമാനൂരിലാണ് നടക്കുന്നത്. ഇതിന് മുന്നോടിയായി നാളെ പാലായിൽ ടു വീലർ റാലി, ഗതാഗത ബോധവൽക്കരണ ക്ലാസ് എന്നിവയും സംഘടിപ്പിച്ചിട്ടുണ്ട്. ഇതിന് ശേഷമാണ് സുദേവിന്റെ മാരത്തോൺ സംഗീതാർച്ചന.