കുമരകം: പൊതുജനങ്ങൾക്ക് ഗാർഹിക/ ഗാർഹീകേതര കുടിവെള്ള കണക്ഷൻ ലഭ്യമാക്കുന്നതിന് കേരള വാട്ടർ അതോറിട്ടി കുമരകം പഞ്ചായത്തിൽ നാളെ രാവിലെ 11 മുതൽ വൈകിട്ട് 3 വരെ കണക്ഷൻമേള നടത്തും. പഞ്ചായത്തിലെ സ്ഥിരതാമസക്കാർക്ക് മേളയിൽ പങ്കെടുക്കാം. കണക്ഷൻ ആവശ്യമുള്ളവർ ഉടമസ്ഥാവകാശ സർട്ടിഫിക്കറ്റ് / പഞ്ചായത്തിൽ നിന്നുള്ള റെസിഡൻഷ്യൽ സർട്ടിഫിക്കറ്റ് / വില്ലേജ് ഓഫീസിൽ നിന്ന് ലഭിക്കുന്ന കൈവശാവകാശ സർട്ടിഫിക്കറ്റ് ഇവയിൽ ഏതെങ്കിലും ഒന്നും ആധാർ/ എൻ.പി.ആർ/ റേഷൻ കാർഡ് എന്നിവയിൽ ഏതെങ്കിലും ഒരെണ്ണത്തിന്റെ സാക്ഷ്യപ്പെടുത്തിയ പകർപ്പും സഹിതം അപേക്ഷ സമർപ്പിക്കണം. ജലലഭ്യതയും സാങ്കേതികത്വവും പരിശോധിച്ച് അർഹരായവർക്ക് മേളയിൽ വെച്ചുതന്നെ കണക്ഷൻ നൽകും. വാട്ടർ അതോറിട്ടി നേരിട്ട് കണക്ഷൻ നൽകണമെങ്കിൽ ഓരോ വ്യക്തിയുടേയും ഭവനത്തിലേക്ക് പൈപ്പ് കണക്ഷൻ ലഭ്യമാക്കുന്നതിനുള്ള എസ്റ്റിമേറ്റ് പ്രത്യേകം തയ്യാറാക്കി നൽകണം. പ്രസ്തുത തുക ഡിപ്പാർട്ട്‌മെന്റിൽ അടച്ച് വർക്ക് ടെൻഡർ ചെയ്ത് നൽകുന്ന മുറയ്ക്ക് കണക്ഷൻ ലഭ്യമാക്കുന്നതാണ്. അല്ലാത്തപക്ഷം വാട്ടർ അതോറിറ്റിയുടെ അംഗീകൃത ലൈസൻസ് പ്ലംബർ മുഖേനയും കണക്ഷൻ എടുക്കാവുന്നതാണ്. മറ്റ് നടപടിക്രമങ്ങൾ 15 ദിവസത്തിനുള്ളിൽ പൂർത്തിയാക്കി കണക്ഷൻ നൽകുന്നതാണ്. ഈ സേവനം പൊതുജനങ്ങൾ പരമാവധി പ്രയോജനപ്പെടുത്തണമെന്ന് ജല അതോറിട്ടി അസിസ്റ്റന്റ് എക്‌സിക്യുട്ടീവ് എൻജിനീയർ അറിയിച്ചു.