കോട്ടയം: പട്ടികജാതി വിഭാഗക്കാരുടെ പണിതീരാത്ത വീടിന് പ്രത്യേക ധനസഹായം അനുവദിക്കുന്നു. തദ്ദേശസ്വയംഭരണ സ്ഥാപനങ്ങൾ ഉൾപ്പെടെ വിവിധ വകുപ്പുകളിൽ നിന്ന് കഴിഞ്ഞ 10 വർഷത്തിനിടെ ധനസഹായം കൈപ്പറ്റിയിട്ടും പണിതീരാത്ത വീടുകൾക്കും സ്വന്തം നിലയിൽ നിർമ്മാണം തുടങ്ങി പൂർത്തിയാക്കാത്ത വീടുകൾക്കും സഹായം ലഭിക്കും. നിർദ്ദിഷ്ട രീതിയിൽ മേൽക്കൂര തീർക്കാത്തതുകൊണ്ട് മുമ്പ് അനുവദിച്ച ധനസഹായത്തിന്റെ അവസാനഗഡു ലഭിക്കാത്തവർക്കും അർഹതയുണ്ട്. എസ്റ്റിമേറ്റിന്റെ അടിസ്ഥാനത്തിൽ പരമാവധി ഒന്നരലക്ഷംരൂപ വരെയാണ് സഹായം. എന്നാൽ ലൈഫ് മിഷൻ പദ്ധതിയിൽ ധനസഹായം കൈപ്പറ്റിയവർക്ക് അർഹതയി​ല്ല. അപേക്ഷകരുടെ കുടുംബ വാർഷിക വരുമാനം ഒരുലക്ഷം രൂപയൊ അതിൽ താഴെയൊ ആയിരിക്കണം.

ആനുകൂല്യം കിട്ടാൻ

ഗുണഭോക്താക്കൾ ജാതി, വരുമാനം, ഭൂമിയുടെ കൈവശാവകാശം, അല്ലെങ്കിൽ വീടിന്റെ ഉടമസ്ഥാവകാശം സംബന്ധിച്ച സാക്ഷ്യപത്രം എന്നിവ സഹിതം ബന്ധപ്പെട്ട പട്ടികജാതി വികസന ഓഫീസർക്ക് നിശ്ചിത മാതൃകയിൽ അപേക്ഷ നൽകണം.

സമർപ്പിക്കേണ്ട രേഖകൾ

► മുമ്പ് സഹായം കൈപ്പറ്റിയിട്ടുള്ളവർ അവസാന ഗഡു പത്ത് വർഷത്തിനുള്ളിലാണെന്ന് തെളിയിക്കുന്ന സാക്ഷ്യപത്രം.

► നിശ്ചിത മാതൃകയിലുള്ള മേൽക്കൂര നിർമ്മിക്കാത്തതിനാൽ അവസാന ഗഡു കൈപ്പറ്റാത്തവർ അത് സംബന്ധിച്ച സാക്ഷ്യപത്രം.

► സ്വന്തമായി നിർമ്മിച്ച് പൂർത്തികരിക്കാത്തവർ കാലപ്പഴക്കം സംബന്ധിച്ച് തദ്ദേശസ്വയംഭരണ സ്ഥാപനത്തി​ന്റെ സാക്ഷ്യപത്രം.

► ഭവന പൂർത്തീകരണത്തിന് ആവശ്യമായ പ്രവൃത്തികൾ സംബന്ധിച്ച് ബിൽഡിംഗ് സൂപ്പർവൈസർ തയ്യാറാക്കിയ എസ്റ്റിമേറ്റ്.

നിബന്ധനകൾ

► ചെയ്യാൻ ഉദ്ദേശിക്കുന്ന പ്രവൃത്തികളിലെ ഓരോ ഇനത്തിനും വേണ്ടി​വരുന്ന തുക വ്യക്തമാക്കുന്ന എസ്റ്റിമേറ്റ് റിപ്പോർട്ട് ഹാജരാക്കണം.

► നിശ്ചിത മാതൃകയിലുള്ള മേൽക്കൂര നിർമ്മിക്കാത്തവർ അതി​ന് ആവശ്യമായ തുക വകയിരുത്തിയശേഷമേ എസ്റ്റിമേറ്റ് എടുക്കാവു.

ധനസഹായം

ഒന്നരലക്ഷം

രൂപ വരെ

അവസാന തീയതി 30