കോട്ടയം: തിരുവാതുക്കലിൽ കഞ്ചാവ് മാഫിയ സംഘം വീട് കയറി ആക്രമണം നടത്തിയ സംഘത്തിലെ രണ്ടു പേർ കൂടി പൊലീസ് പിടിയിലായി. കാരാപ്പുഴ പുതുവീട്ടിൽ സച്ചിൻ സജി (കണ്ണപ്പൻ -20), പുളിനാക്കൽ പയ്യപ്ലാവിൽ മനു (20) എന്നിവരെയാണ് വെസ്റ്റ് സ്റ്റേഷൻ ഹൗസ് ഓഫിസർ സി.ഐ എം.ജെ അരുൺ അറസ്റ്റ് ചെയ്‌തത്. രണ്ടു പേരെയും കോടതിയിൽ ഹാജരാക്കി റിമാൻഡ് ചെയ്‌തു.

ജൂൺ 23ന് വൈകിട്ട് നാലരയോടെയാണ് കഞ്ചാവ് മാഫിയ സംഘം വീട് കയറി ആക്രമണം നടത്തിയത്. തിരുവാതുക്കൽ മാന്താറ്റിൽ കളത്തൂത്തറ വീട്ടിൽ മെഹബൂബിന്റെ വീടും, മുറ്റത്തിരുന്ന സ്‌കൂട്ടറും അക്രമി സംഘം തല്ലിത്തകർത്തിരുന്നു. സംഭവം കണ്ട് ഓടിയെത്തിയ അയൽവാസി കാർത്തിക്കിനെ (24) തലയ്‌ക്കടിച്ച് വീഴ്‌ത്തുകയും ചെയ്‌തിരുന്നു അക്രമി സംഘം. സംഭവവുമായി ബന്ധപ്പെട്ട് വേളൂർ ആണ്ടൂർപറമ്പിൽ വീട്ടിൽ ഷാജിയുടെ മകൻ നിധിൻ ഷാജി(21)യെ പിറ്റേന്ന് തന്നെ പൊലീസ് പിടികൂടിയിരുന്നു. ഇതിനു ശേഷം വേളൂർ മാന്താർ പ്ലാപ്പറമ്പിൽ അജേഷ് കുമാർ (ഷാജി - 49), മകൻ അക്ഷയ അജേഷ് (മോനായി -20), സഹോദരങ്ങളായ ഇരുത്തിക്കൽപറമ്പിൽ റോബിൻ റോയി (സോണപ്പൻ - 24), റോഷൻ റോയി (ജിത്തു -20) എന്നിവരെ ഒരാഴ്‌ച മുൻപും വെസ്റ്റ് പൊലീസ് അറസ്റ്റ് ചെയ്‌തിരുന്നു. ഇതോടെ കേസിൽ ഏഴു പ്രതികൾ പിടിയിലായിട്. ഇന്നലെ അറസ്റ്റിലായ പ്രതികളെ കോടതിയിൽ ഹാജരാക്കി റിമാൻഡ് ചെയ്‌തു.