വൈക്കം : കേരളീയ സംസ്കൃത സാഹിത്യകാരന്മാരിൽ പ്രമുഖനായിരുന്ന വടക്കുംകൂർ രാജരാജവർമ്മയുടെ അനുസ്മരണം സമസ്ത കേരള സാഹിത്യ പരിഷത്തിന്റെ ആഭിമുഖ്യത്തിൽ 27 മുതൽ വൈക്കത്ത് നടത്തും. രാവിലെ 9.30ന് വടക്കുംകൂർ കൊട്ടാരത്തിൽ വെച്ച് പുഷ്പാർച്ചനയും സ്മൃതി ദീപം തെളിയിക്കലും അനുസ്മരണവും നടക്കും. സമസ്ത കേരള സാഹിത്യ പരിഷത്തിന്റെ വൈസ് പ്രസിഡന്റ് ബാലചന്ദ്രൻ, സി.കെ.ആശ എം. എൽ. എ. സ്മൃതി ദീപം തെളിയിക്കും. മുനിസിപ്പൽ ചെയർമാൻ പി.ശശിധരൻ, മഹാകവി പാലാ ട്രസ്റ്റ് സെക്രട്ടറി സാംജി. ടി.വി.പുരം, മോഹൻദാസ് വെച്ചൂർ, അരവിന്ദൻ കെ.എസ്.മംഗലം എന്നിവർ പങ്കെടുക്കും. 10.30ന് സത്യാഗ്രഹ മെമ്മോറിയൽ ഹാളിൽ നടക്കുന്ന സെമിനാർ സംസ്കൃത സർവ്വകലാശാല മുൻ വൈസ് ചാൻസിലർ ഡോ.കെ.ജി.പൗലോസ് ഉദ്ഘാടനം ചെയ്യും. ഡോ.ടി.എൻ.വിശ്വംഭരൻ സ്വാഗതം പറയും. വടക്കുംകൂർ തമ്പുരാൻ ആധുനിക സാഹിത്യ പരിപ്രേഷ്യത്തിൽ വടക്കുംകൂറിന്റെ മഹാകാവ്യങ്ങൾ ഒരു പഠനം, രഘുവീരവിജയം ഒരാസ്വാദനം തുടങ്ങിയ വിഷയങ്ങൾ ഡോ.സി.എം.നീലകണ്ഠൻ, ഡോ.സരിതാ മഹേശ്വരൻ എന്നിവരും വടക്കുംകൂറിന്റെ സാഹിത്യ ദർശനം എന്ന വിഷയം അമ്പലപ്പുഴ ഗോപകുമാറും അവതരിപ്പിക്കും. പരിപാടിയോടനുബന്ധിച്ച് ആന്ധ്രാ സ്വദേശിയായ ഇന്ദുചിന്തയുടെ മലബാറിലെ തെയ്യം കലകളുടെ ചിത്രപ്രദർശനം ഉണ്ടായിരിക്കും. ചിത്രപ്രദർശനം തിരക്കഥാകൃത്ത് പി.ബാലചന്ദ്രൻ ഉദ്ഘാടനം ചെയ്യും.