തലയോലപ്പറമ്പ് : ശക്തമായ കാ​റ്റിൽ മരങ്ങൾ വീണ് മൂന്ന് വീടുകൾ തകർന്നു. ഇന്നലെ രാവിലെ 6 മണിയോടെ കുലശേഖരമംഗലം കൊച്ചങ്ങാടിയ്ക്ക് സമീപം കുളങ്ങര വീട്ടിൽ കെ.ഇ ഉമ്മറിന്റെ വീട് റോഡരികിൽ നിന്ന കൂ​റ്റൻ തേക്ക് മരം ഇലട്രിക്ക് ലൈനിന് മുകളിലൂടെ വീടിന്റെ മുകളിലേക്ക് കടപുഴകി വീഴുകയായിരുന്നു.സംഭവ സമയത്ത് വീടിന് മുൻവശത്ത് ഇരിക്കുകയായിരുന്ന വീട്ടുകാർ ഉടൻ ഓടി മാറിയതിനാൽ പരിക്കേൽക്കാതെ രക്ഷപ്പെടുകയായിരുന്നു. അസി. സ്​റ്റേഷൻ ഓഫീസർ ടി.ഷാജികുമാറിന്റെ നേതൃത്വത്തിൽ വൈക്കത്ത് നിന്നും ഫയർ യൂണി​റ്റെത്തിയാണ് മരം മുറിച്ച് നീക്കിയത്. വീടിന്റെ മേൽക്കൂര തകർന്ന് ഭിത്തിക്ക് വിള്ളലുകൾ വീണു. ഉച്ചയ്ക്ക് 2 മണിയോടെ തലയോലപ്പറമ്പ് വടയാർ ഇൻഫന്റ് ജീസസ് സ്‌കൂളിന് സമീപം പുരയിടത്തിൽ നിന്ന കൂ​റ്റൻ തേക്ക് മരം കടപുഴകി വീണതിനെ തുടർന്ന് വടയാർ സുന്ദരക്കാട്ട് പ്രസാദിന്റെ ഓട് മേഞ്ഞ വീടിന്റെ മേൽക്കൂര ഭാഗീകമായി തകർന്നു. വൈകിട്ട് 3 മണിയോടെ വടയാർ എട്ടടി പാലത്തിന് സമീപം പുരയിടത്തിൽ നിന്ന ആഞ്ഞിലിമരം ഷീ​റ്റ് മേഞ്ഞ വീടിന്റെ മേൽക്കൂരയിലേക്ക് കടപുഴകി വീണ് വടയാർ ഒട്ടാറശ്ശേരിൽ സരളയുടെ വീടിന്റെ മേൽക്കൂര പൂർണമായി തകർന്നു. സംഭവ സമയത്ത് വീട്ടുകാർ ഇല്ലാതിരുന്നതിനാൽ ആളപായം ഒഴിവാകുകയായിരുന്നു.