കോട്ടയം: മീനച്ചിലാർ മീനന്തറയാർ കൊടൂരാർ നദീ പുനർസംയോജനത്തിന്റെ ഭാഗമായ മടയ്ക്കൽ തോട് ലിഫ്റ്റ് ഇറിഗേഷൻ പദ്ധതിയുടെ ഉദ്ഘാടനം 29ന് ജലവിഭവ വകുപ്പ് മന്ത്രി കെ. കൃഷ്ണൻകുട്ടി നിർവഹിക്കും. മീനച്ചിലാറ്റിലെ ആറുമാനൂർ ഭാഗത്തു നിന്നും മടയ്ക്കൽ തോട്ടിലേക്ക് വെള്ളം പമ്പ് ചെയ്ത് ചൊറിച്ചി തോടുവഴി വെള്ളൂർ തോട്ടിലൂടെ മീനന്തറയാറിൽ എത്തിക്കുന്നതാണ് പദ്ധതി.

മടയ്ക്കൽ തോടിന് സമീപം ഉച്ചകഴിഞ്ഞ് 2.30ന് നടക്കുന്ന ചടങ്ങിൽ ഉമ്മൻചാണ്ടി എം.എൽ.എ അദ്ധ്യക്ഷത വഹിക്കും. തോമസ് ചാഴികാടൻ എം.പി മുഖ്യപ്രഭാഷണം നടത്തും. മീനച്ചിലാർ മീനന്തറയാർ കൊടൂരാർ നദീ പുനർസംയോജന പദ്ധതി കോ-ഓർഡിനേറ്റർ കെ. അനിൽകുമാർ ആമുഖ പ്രഭാഷണം നടത്തും. ചെറുകിട ജലസേചന വകുപ്പ് സൂപ്രണ്ടിംഗ് എൻജിനീയർ ഡോ.എ. ഉദയകുമാർ റിപ്പോർട്ട് അവതരിപ്പിക്കും.

പള്ളം ബ്ലോക്ക് പഞ്ചായത്ത് പ്രസിഡന്റ് ടി.ടി ശശീന്ദ്രനാഥ്, അയർക്കുന്നം ഗ്രാമപഞ്ചായത്ത് പ്രസിഡന്റ് മോളി തോമസ്, ജില്ലാ പഞ്ചായത്തംഗം ലിസമ്മ ബേബി, അയർക്കുന്നം ഗ്രാമപഞ്ചായത്ത് പ്രസിഡന്റ് അജിത് കുന്നപ്പള്ളി, പഞ്ചായത്ത് സ്റ്റാൻഡിംഗ് കമ്മിറ്റി അദ്ധ്യക്ഷരായ ജോസഫ് ചാമക്കാല, നിസ കുഞ്ഞുമോൻ, ഗീതാ രാധാകൃഷ്ണൻ, മറ്റു ജനപ്രതിനിധികൾ, രാഷ്ട്രീയ പാർട്ടി പ്രതിനിധികൾ തുടങ്ങിയവർ പങ്കെടുക്കും. ജലസേചന വകുപ്പ് ചീഫ് എൻജിനീയർ കെ.എച്ച് ഷംസുദീൻ സ്വാഗതവും ചെറുകിട ജലസേചന വിഭാഗം എക്‌സിക്യൂട്ടീവ് എൻജിനീയർ കെ.കെ അൻസാർ നന്ദിയും പറയും.