പ്രധാനമന്ത്രി നരേന്ദ്ര മോദിയെയും ഇന്ത്യൻ ക്രിക്കറ്റ് താരം മഹേന്ദ്ര സിംഗ് ധോണിയെയും വിമർശിക്കുന്നവർക്കെതിരെ സംവിധായകൻ പ്രിയദർശൻ രംഗത്ത്. 'മോദിയെയും ധോണിയെയും വിമർശിക്കുന്നത് നിറുത്തൂ...രാജ്യത്തിന്റെ യശസുയർത്തുന്ന പ്രവൃത്തിയിലാണവർ'- തന്റെ ഫേസ്ബുക്കിലൂടെയാണ് മോദിക്കും ധോണിക്കുമുള്ള പിന്തുണ പ്രിയദർശൻ അറിയിച്ചത്.

ലോകകപ്പ് മത്സരത്തിലെ പ്രകടനത്തിന്റെ പേരിൽ എം.എസ് ധോണിക്ക് നേരെ ഒരുപാട് വിമർശനങ്ങൾ ഉയർന്നിരുന്നു. ധോണി വിരമിക്കേണ്ട സമയമായി എന്നതാണ് ഏറ്റവും കൂടുതൽ കേട്ടത്. അഫ്ഗാനിസ്ഥാനെതിരായ മത്സരത്തിന് പിന്നാലെ, വിൻഡിസിനെതിരേയും ഇന്നിംഗ്‌സ് പടുത്തുയർത്താൻ ധോണി സമയം എടുത്തതാണ് ചിലരെ പ്രകോപിപ്പിക്കുന്നത്.ഇതിനെതിരെയാണ് പ്രിയദർശന്റെ കുറിപ്പ്.

പ്രധാനമന്ത്രി നരേന്ദ്രേ മോദിയെ പിന്തുണച്ച് നേരത്തെയും പ്രിയദർശൻ രംഗത്തെത്തിയിരുന്നു. 'നിങ്ങളാണ് എന്റെ രാജ്യത്തിന്റെ ശക്തി. ഹൃദയം നിറഞ്ഞ ആശംസകൾ' എന്നാണ് മോദി രണ്ടാമതും പ്രധാന്ത്രിയായി അധികാരമേറ്റപ്പോൾ പ്രിയദർശൻ ഫേസ്ബുക്കിൽ കുറിച്ചത്.