തിരുവനന്തപുരം: ഓട്ടോറിക്ഷാ ഡ്രൈവർമാരിൽ ചിലർ യാത്രക്കാരിൽ നിന്ന് തോന്നിയപടി കാശ് വാങ്ങുന്നെന്ന് പരാതി പതിവാണ്. യാത്രക്കാരിൽ പലർക്കും ഓട്ടോയാത്രയ്ക്കുള്ള ചാർജ് എത്രയെന്നറിയാത്തതാണ് പലപ്പോഴും പ്രശ്നങ്ങൾക്ക് ഇടയാക്കുന്നത്. ഇവയ്ക്ക് പരിഹാരമായി കേരളത്തിലെ ഓട്ടോനിരക്ക് സംബന്ധിച്ച പട്ടിക കേരളപൊലീസ് പുറത്തിറക്കി. ഓട്ടോയാത്രയ്ക്കുള്ള മിനിമം ചാർജ് 25 രൂപയാണെന്നും ഈ തുകയിൽ 1.5 കിലോമീറ്റർ യാത്ര ചെയ്യാമെന്നും പട്ടികയിൽ പറയുന്നു.

മിനിമം ചാർജിൽ സഞ്ചരിക്കാവുന്ന 1.5 കിലോമീറ്ററിന് ശേഷമുള്ള അരകിലോമീറ്റർ ഇടവിട്ടുള്ള നിരക്കുകളും പട്ടികയിൽ നൽകിയിട്ടുണ്ട്. യാത്ര ചെയ്യാവുന്ന കൃത്യമായ ദൂരം പട്ടികയിൽ ഉള്‍പ്പെട്ടിട്ടില്ലെങ്കിൽ യാത്ര ചെയ്യുന്ന ഓരോ 100 മീറ്ററിനും 1.2 രൂപ വച്ച് നൽകണം.

രാത്രി പത്തുമണിക്ക് ശേഷം പുലർച്ചെ അഞ്ചുമണി വരെയുള്ള യാത്രകൾക്ക് സാധാരണ നിരക്കിന്റെ 50 ശതമാനം അധിക തുക ഈടാക്കാൻ സാധിക്കുമെന്നും പട്ടികയിൽ പറയുന്നു.

തിരുവനന്തപുരം, കൊല്ലം, തൃശ്ശൂർ, കോഴിക്കോട്, കണ്ണൂർ, പാലക്കാട്, കോട്ടയം എന്നീ സ്ഥലങ്ങൾ ഒഴികെയുള്ളിടത്ത് രാവിലെ അഞ്ച് മുതൽ രാത്രി പത്ത് വരെയുള്ള യാത്രയ്ക്ക് മിനിമം ചാർജിന് പുറമേയുള്ള തുകയുടെ 50 ശതമാനം അധികമായി നല്‍കണം. ഇരുവശത്തേക്കുമുള്ള യാത്രയ്ക്ക് മീറ്റർ ചാർജ് നൽകിയാൽ മതി.

സംസ്ഥാന ഗതാഗത കമ്മീഷണറുടെ നിർദ്ദേശ പ്രകാരം കേരള മോട്ടോർവാഹന വകുപ്പ് ഇറക്കിയ ഓട്ടോറിക്ഷാ നിരക്കിന്റെ അടിസ്ഥാനത്തിലാണ് കേരളാ പൊലീസിന്റെ ഫേസ്ബുക്ക് പോസ്റ്റ്.