ഇനി മുതൽ ഓറഞ്ച് കഴിച്ചു കഴിഞ്ഞ് തൊലി വലിച്ചെറിയേണ്ട, ഇതുപോലെ നല്ല രുചികരമായ ഒരു അച്ചാർ ആക്കി ഉപയോഗിക്കാം. വളരെ എളുപ്പത്തിൽത്തന്നെ തയാറാക്കാവുന്ന ഒരു അച്ചാർ ആണ് ഇത്. നല്ല പഴുത്ത തൊലി വേണം അച്ചാറിനുപയോഗിക്കാൻ.

ആവശ്യമായ സാധനങ്ങൾ
1പഴുത്ത ഓറഞ്ച് തൊലി 1 വലിയ ഓറഞ്ചിന്റത്
2, വെളുത്തുള്ളി 4 അല്ലി
3, ഇഞ്ചി അരിഞ്ഞത് 1/4 ടീസ്പൺ
4, പച്ചമുളക് 2
5, മുളകുപൊടി 1.5 ടീസ്പൺ
6, മഞ്ഞൾപൊടി 3 നുള്ള്
7, ഉലുവപ്പൊടി 1 നുള്ള്
8, കായപ്പൊടി 3 നുള്ള്
9,വിനാഗിരി 3 ടീസ്പൂൺ

10, നല്ലെണ്ണ, ഉപ്പ്, കടുക് പാകത്തിന്
11, കറിവേപ്പില 1 തണ്ട്

തയാറാക്കുന്ന വിധം

ഓറഞ്ച് തൊലി ചെറുതായി അരിഞ്ഞ് കുറച്ചു വെള്ളം ചേർത്ത് തിളപ്പിച്ച് വെള്ളം ഊറ്റി എടുക്കുക. പാനിൽ എണ്ണ ചൂടാക്കി കടുക്, കറിവേപ്പില ഇവ ചേർത്ത് മൂപ്പിച്ച് , ചെറുതായി അരിഞ്ഞ വെളുത്തുള്ളി, ഇഞ്ചി, പച്ചമുളക് ഇവ ചേർത്ത് വഴറ്റുക. ശേഷം തിളപ്പിച്ച് വെള്ളം ഊറ്റി വെച്ചിരിക്കുന്ന ഓറഞ്ച് തൊലി ചേർത്ത് ഇളക്കുക. തൊലി എണ്ണയിൽ കിടന്ന് നന്നായി വരണ്ട് ഡ്രൈ ആയിവരണം, അതാണ് സ്വാദ്. തൊലി നന്നായി വരണ്ടു വരുമ്പോൾ പാകത്തിന് ഉപ്പ്, മഞ്ഞൾപൊടി, മുളകുപൊടി, ഉലുവപ്പൊടി, കായപ്പൊടി ഇവ ചേർത്തിളക്കി പച്ചമണം മാറിക്കഴിയുമ്പോൾ വിനാഗിരി കൂടെ ചേർത്തിളക്കി തീ ഓഫ് ചെയ്യാം. ചൂടാറിയ ശേഷം വായുകടക്കാതെ കുപ്പിയിലാക്കി സൂക്ഷിക്കാം.ഉണ്ടാക്കിയ ഉടൻതന്നെ ഉപയോഗിക്കാൻ പറ്റുന്ന അച്ചാർ ആണ് ഇത്. കൂടാതെ വളരെ രുചികരവും. എല്ലാവരും ഉണ്ടാക്കി നോക്കു.