തിരുവനന്തപുരം: കേന്ദ്ര ബഡ്‌ജറ്റിൽ സ്വർണത്തിന്റെ ഇറക്കുമതി ചുങ്കം 12.5 ശതമാനമാക്കി ഉയർത്തിയ തീരുമാനം പുനഃപരിശോധിക്കണമെന്ന് ഓൾ കേരള ഗോൾഡ് ആൻഡ് സിൽവർ മർച്ചന്റ്‌സ് അസോസിയേഷൻ (എ.കെ.ജി.എസ്.എം.എ)​ ആവശ്യപ്പെട്ടു. ബഡ്‌ജറ്റിന് മുമ്പ്,​ സ്വർണത്തിന്റെ ഇറക്കുമതി ചുങ്കം പത്തു ശതമാനമായിരുന്നു. ഇതുതന്നെ,​ കൂടുതലാണെന്നും കുറയ്ക്കാത്ത പക്ഷം കള്ളക്കടത്ത് വർദ്ധിക്കുമെന്നും വ്യാപാരികൾ ചൂണ്ടിക്കാട്ടിയിരുന്നു. പക്ഷേ,​ ബഡ്‌ജറ്റിൽ ചുങ്കം വർദ്ധിപ്പിക്കുകയാണ് ഉണ്ടായത്.

നിയമാനുസൃതവും സത്യസന്ധമായും കച്ചവടം നടത്തുന്നവരെ തകർക്കുന്ന നടപടിയാണിത്. ജി.എസ്.ടി.,​ ആദായ നികുതി എന്നിങ്ങനെ വിവിധ വിഭാഗങ്ങളിലായി സർക്കാരിന് വൻ വരുമാനം നൽകുന്ന മേഖലയാണ് സ്വർണ വിപണി. നേരിട്ടും അല്ലാതെയും ലക്ഷക്കണക്കിനു പേർക്ക് തൊഴിലും ഈ മേഖല നൽകുന്നു. എന്നിട്ടും,​ ചുങ്കം വർദ്ധിപ്പിച്ചത് ഖേദകരമാണെന്നും ഇത് ഏഴ് ശതമാനത്തിന് താഴെയായി കുറയ്‌ക്കുകയാണ് വേണ്ടതെന്നും അസോസിയേഷൻ പ്രസിഡന്റ് ഡോ.ബി. ഗോവിന്ദൻ പറഞ്ഞു.