ബംഗളൂരു: അവിശ്വാസപ്രമേയത്തിൽ ആടിയുലഞ്ഞ് കർണാടകയിലെ കോൺഗ്രസ് - ജെ.ഡി.എസ് സഖ്യസർക്കാർ.

പുറത്തുപോയ വിമത എം.എൽ.എമാരുടെ രാജിക്കാര്യത്തിൽ സ്പീക്കർക്ക് തീരുമാനമെടുക്കാമെന്നാണ് സുപ്രീംകോടതി വിധിയെങ്കിലും തിരികെ വരില്ലെന്ന് എം.എൽ.എമാർ ഉറച്ചനിലപാട് എടുത്തതോടെ,​ സംസ്ഥാനഭരണം കൈവിടേണ്ടിവരുമെന്ന് മുഖ്യമന്ത്രി കുമാരസ്വാമിക്ക് ഏറക്കുറെ ഉറപ്പായി. ഇന്ന് നടക്കുന്ന അവിശ്വാസ വോട്ടെടുപ്പിൽ വിമത എം.എൽ.എമാർ പങ്കെടുക്കില്ലെന്നാണ് സൂചന. മാത്രമല്ല,​ വിമത എം.എൽ.എമാർ സഭാനടപടികളിൽ പങ്കെടുക്കണമെന്ന് നിർബന്ധിക്കാനാകില്ലെന്ന് സുപ്രീംകോടതി വ്യക്തമാക്കിയതോടെ പാർട്ടികൾക്ക് വിപ്പ് കർശനമാക്കാനുമാകില്ല.

അതേസമയം,​ കുമാരസ്വാമി മുഖ്യമന്ത്രിസ്ഥാനം ഇന്ന് രാജിവച്ചേക്കുമെന്നും റിപ്പോർട്ടുകളുണ്ട്. മുംബയിലെ ഹോട്ടലിൽ കഴിയുന്ന എം.എൽ.എമാർ ഇന്നത്തെ അവിശ്വാസ വോട്ടെടുപ്പിൽ പങ്കെടുക്കാതെ വന്നാൽ,​ സർക്കാരിന് ഭൂരിപക്ഷം തെളിയിക്കാനുള്ള സാദ്ധ്യതകളാണ് അസ്തമിക്കുന്നത്.

രാജിവച്ച 16 എം.എൽ.എമാരിൽ 15 പേരാണ്,​ രാജി സ്വീകരിക്കാതിരുന്ന സ്പീക്കറുടെ നടപടിയെ ചോദ്യംചെയ്ത് സുപ്രീംകോടതിയെ സമീപിച്ചത്. ഹർജിയിൽ കക്ഷിചേരാതിരുന്ന കോൺഗ്രസ് വിമത എം.എൽ.എ രാമലിംഗ റെഡ്ഡി രാജി പിൻവലിക്കുമെന്ന് പ്രഖ്യാപിച്ചത് കോൺഗ്രസിന് അല്പം ആശ്വാസം പകരുന്നതാണെങ്കിലും സർക്കാർ താഴെവീഴാതിരിക്കാൻ അതു മതിയാകില്ല.

നിലവിലെ സാഹചര്യത്തിൽ,​ എം.എൽ.എമാരെ അയോഗ്യരാക്കിയാലും,​ അവരുടെ രാജി സ്വീകരിച്ചാലും സർക്കാർ താഴെവീഴും. കാരണം,​ ഇപ്പോഴത്തെ കേവലഭൂരിപക്ഷത്തിനാവശ്യമായ 105 സീറ്റുകൾ ബി.ജെ.പിയുടെ അക്കൗണ്ടിലുണ്ട്.

നിലവിലെ കക്ഷിനില

 രാജിവച്ച വിമതർ - 16 (കോൺഗ്രസ് -13, ദൾ-3)

 ബി.ജെ.പി സഖ്യം-107 (ബി.ജെ.പി -105, സ്വതന്ത്രൻ -1 കെ.പി.ജെ.പി-1

 കോൺ-ദൾ സഖ്യം - 101 (കോൺഗ്രസ്- 66, ദൾ- 34, ബിഎസ്.പി -1)

 രാജികൾ അംഗീകരിച്ചാൽ നിയമസഭയിലെ അംഗബലം - 208

 കേവല ഭൂരിപക്ഷത്തിനു വേണ്ടത് -105