മല്ലപ്പള്ളി: പത്തനംതിട്ടയിലെ ആനിക്കാട് കാരിക്കാമലയിൽ നവജാത ശിശുവിനെ വീട്ടുമുറ്റത്ത് കുഴിച്ചുമൂടിയ നിലയിൽ കണ്ടെത്തി. കരിക്കാമലയിൽ 21കാരി പ്രസവിച്ച കുട്ടിയുടെ മൃതദേഹമാണ് കണ്ടെടുത്തത്. സംഭവത്തിൽ കീഴ്പാവൂർ പൊലീസ് കേസ് രജിസ്റ്റർ ചെയ്തിട്ടുണ്ട്. വീടിന്റെ പിൻവശത്തെ മുറ്റത്താണ് മൃതദേഹം കുഴിച്ചുമൂടിയത്.

തിരുവല്ല ആർ.ഡി.ഒയുടെ നേതൃത്വത്തിൽ മൃതദേഹം കോട്ടയം മെഡിക്കൽ കോളേജ് ആശുപത്രിയിലേക്ക് പോസ്റ്റ് മോർട്ടം നടപടികൾക്കായി കൊണ്ടുപോയിരിക്കുകയാണ്. വെള്ളിയാഴ്ച പ്രസവിച്ച കുഞ്ഞിനെ പിൻവശത്തെ വീട്ടുമുറ്റത്തിന് സമീപം കുഴിച്ചിടുകയായിരുന്നെന്ന് പൊലീസ് പറഞ്ഞു. സംഭവത്തെ തുടർന്ന് യുവതിയും കുടുംബാംഗങ്ങളും പൊലീസ് നിരീക്ഷണത്തിലാണ്. കുഞ്ഞിനെ കുഴിച്ചിട്ടത് ജീവനോടെയാണോ എന്ന് പോസ്റ്റ് മോർട്ടത്തിന് ശേഷം മാത്രമേ പറയാനാവുമെന്ന് പൊലീസ് വ്യക്തമാക്കി.