താനിഷ്ടപ്പെടുന്ന പുരുഷൻ മറ്റ് സ്ത്രീകളെ നോക്കുന്നത് ഒരു കാമുകിക്കും ഇഷ്ടമല്ല. കാമുകന്മാരും ഇക്കാര്യത്തിൽ ഒട്ടും പിറകിലല്ല. എന്നാൽ അന്യസ്ത്രീയെ ഒന്ന് നോക്കി എന്ന കാരണം പറഞ്ഞ് ഭർത്താവിന്റെ തല അടിച്ച് പൊളിച്ചാലോ? അതും ഒരു യമണ്ടൻ ലാപ്പ്‌റ്റോപ്പും കൊണ്ട്? അമേരിക്കയിലാണ് ഇങ്ങനെയൊരു സംഭവം നടന്നത്. മിയാമിയിൽ നിന്നും ലോസ് അഞ്ചൽസിലേക്കുള്ള വിമാനത്തിൽ കയറിയ ഭാര്യയും ഭർത്താവും തമ്മിലായിരുന്നു കശപിശ. വിമാനത്തിൽ കയറിയ സമയം മുതൽക്ക് തന്നെ ഭർത്താവിനോടുള്ള കലിപ്പിലായിരുന്ന ഭാര്യയെ വിമാനത്തിലെ ജീവനക്കാർ അനുനയിപ്പിക്കാൻ ശ്രമിച്ചുവെങ്കിലും ഫലമുണ്ടായില്ല.

തുടർന്ന് വിമാനത്തിലുള്ള മറ്റൊരു സ്ത്രീയെ ഭർത്താവ് നോക്കി എന്നാരോപിച്ച് ഇവർ തമ്മിൽ പിന്നെയും വഴക്ക് കൂടി. തർക്കം മൂർച്ഛിച്ചപ്പോഴാണ് ഭാര്യ ഭർത്താവിന്റെ തലയിൽ ലാപ്ടോപ്പ് കൊണ്ടടിക്കുന്നത്. 'ഇവരെന്നെ ഉപദ്രവിക്കുന്നു' എന്ന് നിലവിളിച്ചുകൊണ്ട് വിമാനത്തിന്റെ മുൻഭാഗത്തേക്ക്‌ ഓടിയ ഭർത്താവിനെ പിന്തുടർന്ന് ചെന്നാണ് ഭാര്യ തലയ്ക്കടിച്ചത്. 'ഇനി മേലാൽ മറ്റ് സ്ത്രീകളെ നോക്കരുത്'എന്ന് പറഞ്ഞുകൊണ്ടായിരുന്നു ഭാര്യയുടെ ലാപ്ടോപ്പ് പ്രയോഗം. ലാപ്ടോപ്പ് കൊണ്ടടിച്ച ശേഷം ദേഷ്യം മാറാതെ കൈകൊണ്ട് വീണ്ടും ഇവർ ഭർത്താവിന്റെ തലയ്ക്കടിക്കുന്നതും കാണാം. ഇവരുടെ പ്രവൃത്തി കണ്ട് വിമാനത്തിലെ ചിലർ നിലവിളിക്കുകയും, മറ്റ് ചിലർ ചിരിക്കുകയും ചെയ്യുന്നുണ്ട്. ഒടുവിൽ ഈ തമ്മിൽതല്ല് സഹിക്കാനാകാതെ ഇവരെ വിമാനത്തിൽ നിന്നും ഇറക്കിവിടുകയായിരുന്നു.