മെഗാ സ്‌റ്റാർ മമ്മൂട്ടിയുടെ ആരാധകർ ഏറെ ആകാംക്ഷയോടെ കാത്തിരിക്കുന്ന ചിത്രമാണ് മാമാങ്കം. മലപ്പുറം ജില്ലയിലെ തിരുനാവായ മണപ്പുറത്ത് പന്ത്രണ്ടു വർഷത്തിലൊരിക്കൽ നടന്നുവന്നിരുന്ന മാമാങ്കം പറയുന്നത് വള്ളുവനാടിന്റെ ചരിത്രമാണ് പറയുന്നത്. മമ്മൂട്ടി കേന്ദ്രകഥാപാത്രമാകുന്ന ചിത്രത്തിൽ യുവതാരം ഉണ്ണി മുകുന്ദനും ശ്രദ്ധേയമായ വേഷം അവതരിപ്പിക്കുന്നുണ്ട്. ഇപ്പോഴിതാ ചിത്രത്തിന്റെ പുതിയ പോസ്‌റ്റർ പുറത്തുവിട്ടിരിക്കുകയാണ് അണിയറ പ്രവർത്തകർ. നായിക കഥാപാത്രത്തെ അവതരിപ്പിക്കുന്ന പ്രാചി തെഹ്‌ലാൻ ആണ് പോസ്‌റ്ററിലെ ശ്രദ്ധേയ സാന്നിധ്യം.
ചിത്രത്തിലെ രണ്ടാമത്തെ പോസ്‌റ്ററാണിത്. ഫസ്‌റ്റ്‌ലുക്ക് പോസ്‌റ്ററിനും മികച്ച പ്രതികരണം ലഭിച്ചിരുന്നു. കാവ്യാ ഫിലംസിന്റെ ബാനറിൽ വേണു കുന്നപ്പള്ളിയാണ് 'മാമാങ്കം' നിർമ്മിക്കുന്നത്. അമ്പതു കോടിയോളം രൂപ മുടക്കിയാണ്‌ ചിത്രം നിർമ്മിക്കുന്നത് എന്നാണ് സൂചന.
നവാഗതനായ സജീവ് പിള്ളയായിരുന്നു മാമാങ്കത്തിന്റെ സംവിധാനം ആദ്യം നിർവഹിച്ചിരുന്നത്. എന്നാൽ നിർമ്മാതാവുമായുള്ള ആശയക്കുഴപ്പത്തിന്റെ പേരിൽ സജീവ് പിള്ളയെ ഒഴിവാക്കുകയായിരുന്നു. പ്രധാന കഥാപാത്രം അവതരിപ്പിച്ചിരുന്ന ധ്രുവനെയും ചിത്രത്തിൽ നിന്ന് ഒഴിവാക്കിയത് ഏറെ വിവാദങ്ങൾക്ക് വഴിവച്ചിരുന്നു. തുടർന്നാണ് ഉണ്ണി മുകുന്ദൻ ചിത്രത്തിലേക്ക് എത്തപ്പെട്ടത്. പദ്‌മകുമാറാണ് ഇപ്പോൾ ചിത്രത്തിന്റെ സംവിധായകൻ.