മുംബയ്: ബോളിവുഡ് സൂപ്പർ താരവും 'ബിഗ് ബി' അമിതാഭ് ബച്ചന്റെ മകനുമായ അഭിഷേക് ബച്ചന്റെ ഏറ്റവും പുതിയ ചിത്രത്തിൽ അഭിനയിക്കാനൊരുങ്ങി മലയാളത്തിന്റെ പ്രിയ സിനിമാ, ടി.വി താരം പേർളി മാണി. ഈ ചിത്രത്തിന്റെ ചിത്രീകരണം മുംബയിൽ പുരോഗമിച്ചുകൊണ്ടിരിക്കുകയാണ്. ആദിത്യ റോയ് കപൂറും പ്രധാന വേഷത്തിലെത്തുന്നുണ്ട്.

ഏറെ പ്രേക്ഷക ശ്രദ്ധ നേടിയ ബർഫി, ലൈഫ് ഇൻ എ മെട്രോ, എന്നീ ചിത്രങ്ങൾ സംവിധാനം ചെയ്ത അനുരാഗ് ബസുവാണ് ഈ ചിത്രവും സംവിധാനം ചെയ്യുന്നത്. വെല്ലുവിളി ഉയർത്തുന്ന കഥാപാത്രമാണ് ചിത്രത്തിൽ പേർളിയുടേത് എന്നാണ് പുറത്തുവരുന്ന വിവരം. ചിത്രത്തിന്റെ ആദ്യ ഷെഡ്യൂൾ മുംബയിൽ അവസാനിച്ചു. അടുത്ത ഷെഡ്യൂൾ ചിത്രീകരണത്തിൽ അഭിനയിക്കുകയാണ് പേർളി ഇപ്പോൾ. മൂന്നാമത്തെ ഷെഡ്യൂൾ ഗോവയിൽ വച്ചാണ് ചിത്രീകരിക്കുക.

'ലൈഫ് ഇൻ എ മെട്രോ' എന്ന ബസു ചിത്രത്തിന്റെ രണ്ടാം ഭാഗമാണ് ഈ ചിത്രമെന്നും അഭ്യൂഹങ്ങളുണ്ട്. ചിത്രം 2020ൽ പുറത്തിറക്കാനാണ് അണിയറപ്രവർത്തകർ പദ്ധതിയിടുന്നത്. അഭിഷേകിനൊപ്പം രാജ്‌കുമാർ റാവു, പങ്കജ് ത്രിപാഠി എന്നിവരും ചിത്രത്തിൽ അഭിനയിക്കുന്നുണ്ട്. തന്റെ ഔദ്യോഗിക ഫേസ്ബുക്ക് പേജിലൂടെ ഇക്കാര്യത്തെ കുറിച്ചുള്ള വാർത്ത പേർളി മാണി ഷെയർ ചെയ്തിട്ടുണ്ട്. 'എന്റെ അടുത്ത ബോളിവുഡ് ചിത്രത്തെ കുറിച്ചുള്ള വാർത്ത' എന്ന് കുറിച്ചുകൊണ്ടാണ് പേർളി വാർത്ത ആരാധകരുമായി പങ്കുവച്ചത്.