ഹെെദരാബാദ്: മദ്യപിച്ച് ലെക്കുകെട്ട യുവാവ് പൊലീസുകാരിൽ നിന്ന് ചോദിച്ചുവാങ്ങിച്ചത് മുട്ടൻപണി. ഹെെദരാബാദ് സ്വദേശിയായ പി. ഭാനു എന്ന ഇരുപത്തിയെട്ടുകാരനാണ് മദ്യപിച്ച് പണി ചോദിച്ച് വാങ്ങിയിരിക്കുന്നത്.

നല്ലുഗുണ്ടയിലെ തെരുവിൽ സുഹൃത്തുക്കൾക്കൊപ്പം ബൊനാലു ആഘോഷം തകർക്കുകയായിരുന്നു ഭാനു. ഘോഷയാത്രയിൽ ഭാനുവും കൂട്ടുകാരനും ഡ്രമ്മുകളുടെ താളത്തിനൊപ്പം ആടിപ്പാടി. ഇതിനിടെ മദ്യപിച്ചിരുന്ന ഭാനു വഴിയില്‍ നിന്ന പൊലീസുകാരനെ തടഞ്ഞു. തുടർന്ന് കെട്ടിപ്പിടിച്ച ശേഷം പൊലീസുകാരന് ചുണ്ടിൽ ഒരു ചുംബനം നൽകി. പിന്നീട് ഭാനുവിനെ പൊലീസ് അറസ്റ്റ് ചെയ്തു. ഡ്യൂട്ടിയിലുള്ള പൊലീസുകാരനെ അതിൽനിന്ന് തടയുക, മോശമായി പെരുമാറുക എന്നീ വകുപ്പുകൾ ഉപയോഗിച്ചാണ് നല്ലുഗുണ്ട പൊലീസ് ഭാനുവിനെ അറസ്റ്റ് ചെയ്തത്. എന്നാൽ മദ്യപിച്ച് ബോധമില്ലാത്ത അവസ്ഥയായിരുന്നതി താൻ ആ സമയത്ത് എന്താണ് ചെയ്യുന്നതെന്ന് അറിഞ്ഞിരുന്നില്ലെന്നാണ് ഭാനുവിന്റെ വാദം.