പയ്യോളി : പയ്യോളി അയനിക്കാട് കുറ്റിയിൽ പീടികയിൽ കാറും ടിപ്പറും കൂട്ടിയിടിച്ച് രണ്ട് മെഡിക്കൽ വിദ്യാർത്ഥികൾ മരിച്ചു. ചോമ്പാല കുഞ്ഞിപ്പള്ളി തൗഫീഖ് മൻസിൽ അബ്ദുൽ അസീസിന്റെ മകൻ മുഹമ്മദ് ഫായിസ് (20), പേരാമ്പ്ര പൈതോത്ത് തട്ടോത്ത് വീട്ടിൽ വിജയന്റെ മകൻ വിഷ്ണു(19) എന്നിവരാണ് മരിച്ചത്.ചെന്നൈയിൽ എം.ബി. ബി എസ് വിദ്യാർത്ഥികളാണ് ഇരുവരും.

ഇന്നലെ പുലർച്ചെ രണ്ടു മണിക്കായിരുന്നു അപകടം. തലശ്ശേരി ഭാഗത്തേക്ക് പോവുകയായിരുന്ന കാറും കോഴിക്കോട് ഭാഗത്തേക്ക് പോവുകയായിരുന്ന ടാങ്കർ ലോറിയുമാണ് കൂട്ടിയിടിച്ചത്. അപകടത്തെ തുടർന്ന് ദേശീയ പാതയിൽ ഏറെ നേരം ഗതാഗതക്കുരുക്ക് ഉണ്ടായി. വടകരയിൽ നിന്നെത്തിയ ഫയർഫോഴ്സ് യൂണിറ്റും പയ്യോളി പോലീസും നാട്ടുകാരും മറ്റു വാഹനയാത്രക്കാരും ചേർന്നാണ് രക്ഷാപ്രവർത്തനം നടത്തിയത്. ഗുരുതരമായി പരിക്കേറ്റ രണ്ടുപേരെയും കോഴിക്കോട് മെഡിക്കൽ കോളജ് ആശുപത്രിയിൽ പ്രവേശിപ്പിച്ചെങ്കിലും പിന്നീട് മരണപ്പെടുകയായിരുന്നു.