ചാവക്കാട്: പുന്ന സെന്ററിൽ കോൺഗ്രസ് ബൂത്ത് പ്രസിഡന്റ് ഉൾപ്പെടെ നാലുപേരെ ഏഴ് ബൈക്കുകളിലെത്തിയ 15 അംഗ സംഘം വെട്ടിപ്പരിക്കേൽപ്പിച്ചു. രണ്ടുപേരുടെ നില ഗുരുതരമാണ്. നാലുപേരെയും തൃശൂരിലെ എലൈറ്റ് ആശുപത്രിയിൽ പ്രവേശിപ്പിച്ചു. നേരത്തെ പുന്നയിൽ കോൺഗ്രസ് - എസ്.ഡി.പി.ഐ സംഘട്ടനം ഉണ്ടായിരുന്നു. ഇതിന്റെ തുടർച്ചയാണ് ആക്രമണമെന്നാണ് നിഗമനം. ബൂത്ത് പ്രസിഡന്റ് പുതുവീട്ടിൽ നൗഷാദ് (പുന്ന നൗഷാദ്- 44), കാവീട് സ്വദേശി ബിജേഷ്(40), പാലയൂർ പുതുവീട്ടിൽ നിഷാദ്(28), പുന്ന അയിനിപ്പുള്ളി സുരേഷ്(38) എന്നിവർക്കാണ് വെട്ടേറ്റത്. ഇന്നലെ വൈകീട്ട് 6.30 നായിരുന്നു ആക്രമണം. നൗഷാദ് നിരവധി കേസുകളിൽ പ്രതിയാണ്.