ചാവക്കാട്: തൃശൂർ ചാവക്കാട് പുന്ന സെന്ററിൽ ബൈക്കിലെത്തിയ സംഘത്തിന്റെ വെട്ടേറ്റ് ഗുരുതരാവസ്ഥയിൽ ചികിത്സയിലായിരുന്ന കോൺഗ്രസ് ബൂത്ത് പ്രസിഡന്റ് പുതുവീട്ടിൽ നൗഷാദ് എന്ന പുന്ന നൗഷാദ് (44) കൊല്ലപ്പെട്ടു. സംഭവത്തിൽ പരിക്കേറ്റ് മറ്റ് മൂന്ന് കോൺഗ്രസ് പ്രവർത്തകർ ചികിത്സയിലാണ്. സംഭവത്തിന് പിന്നിൽ എസ്.ഡി.പി.ഐ പ്രവർത്തകരാണെന്ന് കോൺഗ്രസ് ആരോപിച്ചു. എന്നാൽ സംഭവത്തിന് പിന്നിൽ തങ്ങൾക്ക് ബന്ധമില്ലെന്നാണ് എസ്.ഡി.പി.ഐയുടെ വാദം.

നേരത്തെ പുന്നയിൽ കോൺഗ്രസ് - എസ്.ഡി.പി.ഐ സംഘട്ടനം ഉണ്ടായിരുന്നു. ഇതിന്റെ തുടർച്ചയാണ് ആക്രമണമെന്നാണ് നിഗമനം. കാവീട് സ്വദേശി ബിജേഷ്(40), പാലയൂർ പുതുവീട്ടിൽ നിഷാദ്(28), പുന്ന അയിനിപ്പുള്ളി സുരേഷ്(38) എന്നിവരാണ് തൃ‌ശൂരിലെ സ്വകാര്യ ആശുപത്രിയിൽ ചികിത്സയിൽ കഴിയുന്നത്. ഇതിൽ ബിജേഷിന്റെ നില ഇപ്പോഴും ഗുരുതരമായി തുടരുകയാണ്. ഇന്നലെ വൈകീട്ട് 6.30 നായിരുന്നു ആക്രമണം. പുന്ന സെന്ററിൽ നിൽക്കുകയായിരുന്ന ഇവരെ ഏഴ് ബൈക്കുകളിലെത്തിയ 14 അംഗ സംഘം വെട്ടിപ്പരിക്കേൽപ്പിച്ചു.പരിക്കേറ്റവരെ ഉടൻ തന്നെ സ്വകാര്യ ആശുപത്രിയിൽ പ്രവേശിപ്പിച്ചു. എന്നാൽ മാരകമായി പരിക്കേറ്റ നൗഷാദ് ഇന്ന് മരണത്തിന് കീഴടങ്ങുകയായിരുന്നു. സംഭവത്തിൽ പ്രതിഷേധിച്ച് ഗുരുവായൂരിൽ ഇന്ന് കോൺഗ്രസ് ഹർത്താൽ പ്രഖ്യാപിച്ചു.