കലാകാരന്മാർക്ക് മരണമില്ല എന്ന് പറയാറുണ്ട്. അവർ എന്നും പ്രക്ഷകരുടെ മനസിൽ ഉണ്ടാകും. അത്തരത്തിലൊരാളാണ് മലയാള സിനിമയുടെ പെരുന്തച്ചൻ എന്ന് ആരാധകർ സേനഹത്തോടെ വിളിച്ച തിലകൻ. അദ്ദേഹം നമ്മെ വിട്ടുപോയിട്ട് വർഷങ്ങൾ പിന്നിട്ടിരിക്കുന്നു. എന്നാൽ ഇന്നും ജനഹൃദയങ്ങളിൽ അദ്ദേഹമുണ്ട്. ഇപ്പോഴിതാ തിലകനിൽ കണ്ട ആ പ്രതിഭ പുതുതലമുറയിലെ ഒരു നടനിൽ താൻ കാണുന്നുവെന്ന് വ്യക്തമാക്കിയിരിക്കുകയാണ് സംവിധായകൻ ജോഷി.

ചെമ്പൻ വിനോദിലാണ് തിലകനിലെ പ്രതിഭയെ കാണുന്നതെന്ന് ജോഷി പറഞ്ഞു. 'ഒരു സിനിമയെപ്പറ്റി നന്നായി മനസിലാക്കിയ ശേഷമേ ചെമ്പൻ വിനോദ് അഭിനയിക്കുകയുള്ളു. അതൊരു നല്ല നടന്റെ ലക്ഷണമാണ്. തിലകനിൽ കണ്ട പ്രതിഭ ചെമ്പൻ വിനോദിൽ എനിക്ക് കാണാൻ സാധിക്കുന്നുണ്ട്'-ജോഷി പറഞ്ഞു.

ഒരു പ്രമുഖ മാദ്ധ്യമത്തിന് നൽകിയ അഭിമുഖത്തിലാണ് ജോഷി ഇക്കാര്യം പറഞ്ഞത്. ചെറിയൊരു ഇടവേളയ്ക്ക് ശേഷം ജോഷി സംവിധാനം ചെയ്യുന്ന 'പൊറിഞ്ചു മറിയം ജോസി'ലെ പ്രധാന കഥാപാത്രമായിട്ടെത്തുന്നത് ചെമ്പൻ വിനോദാണ്. ആഗസ്റ്റ് 15ന് ചിത്രം തീയേറ്ററുകളിലെത്തും.