കൊട്ടിയം: കുളവാഴയും മാലിന്യവും നിറഞ്ഞ അയത്തിൽ ബൈപാസ് ജംഗ്ഷനിലെ ആറ് വൃത്തിയാക്കാത്തതിനെതിരെ നാട്ടുകാരുടെ പ്രതിഷേധം ശക്തമാകുന്നു. മഴക്കാലപൂർവ ശുചീകരണത്തിന്റെ ഭാഗമായി നഗരസഭയുടെ നേതൃത്വത്തിൽ ആറിന്റെ ഒരു ഭാഗത്തെ കുളവാഴകൾ നീക്കിയെങ്കിലും അയത്തിൽ ജംഗ്ഷൻ മുതലുള്ള ഭാഗം തൊട്ടിട്ടില്ല. കോർപ്പറേഷന്റെ കിളികൊല്ലൂർ സോണിന്റെ പരിധിയിലുള്ള പ്രദേശത്തെ കുളവാഴകളാണ് നീക്കം ചെയ്യാത്തത്.

കുളവാഴകൾ നീ​ക്കം ചെ​യ്യാ​ത്ത​തി​നാൽ ഈ ഭാഗത്ത് മാ​ലി​ന്യം അടിഞ്ഞുകൂടി ഒ​ഴു​ക്ക് നിലച്ചു. ഇതോടെ പ്രദേശത്ത് അസഹനീയമായ ദുർഗന്ധം വമിക്കുകയും കൊതുകുകൾ പെറ്റുപെരുകുകയുമാണ്. ദുർ​ഗ​ന്ധം കാ​ര​ണം ബ​സ് സ്റ്റോ​പ്പി​ലെ​ത്തു​ന്ന​വർ മൂ​ക്കു​പൊ​ത്തി​ നിൽ​ക്കേണ്ട സ്ഥിതിയാണുള്ളത്. പ്രദേശത്ത് പകർച്ചവ്യാധി പടർന്നുപിടിക്കുമെന്ന ഭയത്തിലാണ് നാട്ടുകാർ.

ആ​റ് വൃ​ത്തി​യാ​ക്കു​ന്നതിനായി കോർ​പ്പ​റേ​ഷ​നി​ലെ ആ​രോ​ഗ്യവി​ഭാ​ഗം ഉ​ദ്യോ​ഗ​സ്ഥ​രെ പ​ല​ത​വ​ണ സ​മീ​പി​ച്ചെ​ങ്കി​ലും യാ​തൊ​രു ന​ട​പ​ടി​യും ഉ​ണ്ടാ​യി​ല്ലെന്ന് നാട്ടുകാർ പറയുന്നു. മ​ഴ​യു​ടെ പേ​ര് പ​റ​ഞ്ഞ് പ്ര​ശ്‌​ന​ത്തിൽ നി​ന്ന് അധികൃതർ ത​ല​യൂ​രു​ക​യാ​ണു​ണ്ടാ​യ​തെ​ന്നാണ് നാ​ട്ടു​കാരുടെ ആ​ക്ഷേപം.

 നഗരസഭ ജനങ്ങളെ പറ്റിക്കുന്നു

കുളവാഴകളും മാ​ലി​ന്യ​വും വൃ​ത്തി​യാ​ക്കാമെന്ന് ഉറപ്പ് നൽകിയ കോർ​പ്പ​റേ​ഷൻ അ​ധി​കൃ​തർ ശു​ചീ​ക​ര​ണ പ്ര​വർ​ത്ത​ന​ങ്ങൾ​ പാ​തിവ​ഴി​യിൽ നിറുത്തി​വ​ച്ച് ജ​ന​ങ്ങ​ളെ പ​റ്റി​ക്കു​ക​യാ​ണ്. കോർ​പ്പ​റേ​ഷൻ അ​ധി​കൃ​ത​രു​ടെ അനാസ്ഥയ്ക്കെതിരെ ഒ​പ്പു​ശേ​ഖ​ര​ണം ന​ട​ത്തുകയും പ്ര​ത്യ​ക്ഷ സ​മ​ര​പ​രി​പാ​ടി​കൾ സംഘടിപ്പിക്കുകയും ചെയ്യും.

അ​യ​ത്തിൽ നി​സാം

കോൺ​ഗ്ര​സ് ബ്ലോ​ക്ക് സെ​ക്ര​ട്ട​റി