കൊല്ലം: മാനവീക മൂല്യങ്ങൾക്ക് വേണ്ടി നിലകൊണ്ട കമ്മ്യൂണിസ്റ്റായിരുന്നു തെങ്ങമം ബാലകൃഷ്ണനെന്ന് സി.പി.ഐ ജില്ലാ സെക്രട്ടറി മുല്ലക്കര രത്നാകരൻ പറഞ്ഞു. സി.പി.ഐ ടൗൺ നോർത്ത് ലോക്കൽ കമ്മിറ്റി സംഘടിപ്പിച്ച തെങ്ങമം ബാലകൃഷ്ണൻ അനുസ്മരണ സമ്മേളനം കടപ്പാക്കട സ്‌പോർട്സ് ക്ലബിൽ ഉദ്ഘാടനം ചെയ്യുകയായിരുന്നു അദ്ദേഹം. രാഷ്ട്രീയത്തിൽ സംസ്‌കാരവും സംസ്‌കാരത്തിൽ രാഷ്ട്രീയവും കാത്തുസൂക്ഷിക്കുന്ന നേതാക്കൾ വളരെ കുറച്ചുപേരേയുള്ളു. ജനങ്ങളുടെ പ്രശ്നങ്ങളിൽ സജീവമായി ഇടപെടുന്ന രാഷ്ട്രീയക്കാരനായിരുന്നു തെങ്ങമമെന്ന് മുല്ലക്കര പറഞ്ഞു. സി.പി.ഐ സിറ്റി സെക്രട്ടേറിയറ്റ് അംഗം ഉളിയക്കോവിൽ ശശി അദ്ധ്യക്ഷത വഹിച്ചു. സംസ്ഥാന കൗൺസിൽ അംഗങ്ങളായ ആർ. വിജയുമാർ, ജി. ലാലു, ഡെപ്യൂട്ടിമേയർ വിജയാ ഫ്രാൻസിസ്, എ. രാജീവ്, ഹണി തുടങ്ങിയവർ സംസാരിച്ചു. എൽ.സി. സെക്രട്ടറി ജി. കൃഷ്ണദാസ് സ്വാഗതം പറഞ്ഞു.