കൊല്ലം : കശുഅണ്ടി മേഖലയിലെ പ്രതിസന്ധി പരിഹരിക്കുവാൻ കേന്ദ്ര ധനകാര്യ വകുപ്പ് മന്ത്രിയുടെ സൗകര്യംകൂടി കണക്കിലെടുത്ത് ഉന്നതതല യോഗം വിളിച്ചു ചേർക്കാമെന്ന് കേന്ദ്ര വാണിജ്യ, വ്യവസായ വകുപ്പ് മന്ത്രി പിയൂഷ് ഗോയൽ എം.പിമാരായ എൻ.കെ പ്രേമചന്ദ്രനും കൊടിക്കുന്നിൽ സുരേഷിനും ഉറപ്പു നൽകി. കശുവണ്ടി മേഖല നേരിടുന്ന പ്രതിസന്ധി പരിഹരിക്കുന്നതിന് പ്രത്യേക പാക്കേജ് അനുവദിക്കണമെന്നാവശ്യപ്പെട്ട് ഇവർ കേന്ദ്ര മന്ത്രിയെ കണ്ടതിന് തുടർന്നാണ് ഉറപ്പു നൽകിയത്. കശുവണ്ടി മേഖലയിലെ പ്രതിന്ധി പരിഹരിക്കുന്നതിനായി മുഖ്യമന്ത്രി വിളിച്ചു ചേർത്ത യോഗത്തിലെടുത്ത തീരുമാനങ്ങൾ നടപ്പാക്കണമെന്ന് എംപിമാർ ആവശ്യപ്പെട്ടു. ബാങ്കുകളുടെ ഭാഗത്തു നിന്നും ഉദാരമായ സമീപനം സ്വീകരിക്കുവാൻ മുഖ്യമന്ത്രി തല യോഗത്തിൽ തീരുമാനമായെങ്കിലും നാളിതുവരെ നടപ്പാക്കിട്ടില്ല. യോഗ തീരുമാന പ്രകാരം സംസ്ഥാന സർക്കാർ കേന്ദ്ര സർക്കാരിന് സമർപ്പിച്ചിട്ടുളള റിപ്പോർട്ടിനെ ആസ്പദമാക്കി ബാങ്കുകൾ കശുവണ്ടി മേഖലയെ പ്രത്യേക പരിഗണന നൽകി പുനരുദ്ധരിക്കുവാൻ ആവശ്യമായ നിർദ്ദേശം കേന്ദ്ര സർക്കാർ സ്വീകരിക്കണമെന്നും എം.പിമാർ ആവശ്യപ്പെട്ടു. കശുവണ്ടി വ്യവസായ സംരക്ഷണ സമിതി കൺവീനർ കെ. രാജേഷ്, വൈസ് പ്രസിഡന്റ് ബി. മാത്യുകുട്ടി എന്നിവരും മന്ത്രിയുമായുളള ചർച്ചയിൽ പങ്കെടുത്തു.