കൊട്ടാരക്കര: പ്രായപൂർത്തിയാകാത്ത കുട്ടികളെ ഉപയോഗിച്ച് വാഹന മോഷണം നടത്തിയിരുന്ന യുവാവ് പിടിയിൽ.കടക്കൽ മാങ്കോട് സലീന മൻസിലിൽ ആദിൻഷാ(24)യാണ്‌ കടയ്ക്കൽ പൊലീസിന്റെ പിടിയിലായത്. 22ന് വൈകിട്ട് വാഹനപരിശോധനക്കിടെ രേഖകൾ ഹാജരാക്കാതിരിക്കുകയും ചോദ്യങ്ങൾക്ക് വ്യക്തമായ ഉത്തരം പറയാതിരിക്കുകയും ചെയ്തതിനെ തുടർന്ന് സ്റ്റേഷനിൽ കൂട്ടികൊണ്ടുപോയി കൂടുതൽ അന്വേഷണം നടത്തിയപ്പോഴാണ് മോഷണവിവരം വെളിവായത്.

ഇരുചക്രവാഹനങ്ങളാണ് മോഷ്ടിക്കാറുള്ളതെന്നും പ്രായപൂർത്തിയാകാത്ത കുട്ടികളെയാണ് ഇതിനായി ഉപയോഗിക്കുന്നതെന്നും പ്രതി സമ്മതിച്ചു. വെഞ്ഞാറമ്മൂട്, വട്ടപ്പാറ, മെഡിക്കൽ കോളേജ്, കൊല്ലം ഈസ്റ്റ് എന്നീ സ്റ്റേഷനുകളിൽ കേസുകൾ നിലവിലുണ്ട്. തിരുവനന്തപുരം, കൊല്ലം ജില്ലകളിലെ പല സ്റ്റേഷൻ പരിധികളിൽ നിന്നായി മോഷ്ടിച്ച ആറ് ഇരുചക്രവാഹനങ്ങൾ കണ്ടെടുത്തു.

കടക്കൽ ഇൻസ്‌പെക്ടർ രാജേഷ്, എസ്.ഐമാരായ സജു, സജീർ, ഗ്രേഡ് എസ്.ഐ സുരേഷ്, എ.എസ്.ഐ മാരായ സാബുലാൽ, ഗോപകുമാർ, പ്രശാന്ത് സി.പി.ഒ സജീവ് ഖാൻ എന്നിവർ അന്വേഷണ സംഘത്തിലുണ്ടായിരുന്നു.