ആറ്റിങ്ങൽ: സത്യസായി ഓർഫനേജ് ട്രസ്റ്റ് കേരളയും ആറ്റിങ്ങൽ മുനിസിപ്പാലിറ്റിയും സംയുക്തമായി ആറ്റിങ്ങൽ വലിയകുന്ന് ഗവ. താലൂക്ക് ആശുപത്രിയിൽ നവജീവനം സൗജന്യ ഡയാലിസിസ് കേന്ദ്രം ആരംഭിക്കാൻ തീരുമാനിച്ചു. ഒരുകോടി രൂപ മുതൽ മുടക്കിയാണ് സത്യസായി ട്രസ്റ്റ് ഈ പദ്ധതി ആരംഭിക്കുന്നത്. 2050 സ്ക്വയർ ഫീറ്റ് കെട്ടിടം,​ 40 മീറ്റർ റാമ്പ്,​ 4 ഡയാലിസിസ് മെഷീനുകൾ,​ ആർ.ഒ പ്ലാന്റ് തുടങ്ങിയവ ഈ പദ്ധതിപ്രകാരം ഒരുക്കും. ട്രസ്റ്റിന്റെ പത്താമത് സൗജന്യ ഡയാലിസിസ് കേന്ദ്രമാണിത്. ഇതുസംബന്ധിച്ച വ്യവസ്ഥകൾ ആറ്റിങ്ങൽ മുനിസിപ്പൽ ഓഫീസിൽ വച്ച് നഗരസഭാ ചെയർമാൻ എം .പ്രദീപും സത്യസായി ഓർഫനേജ് ട്രസ്റ്റ് കേരള ഫൗണ്ടർ ആൻഡ് എക്സിക്യൂട്ടീവ് ഡയറക്ടർ കെ.എൻ. ആനന്ദകുമാറും ഒപ്പുവച്ചു.