കാട്ടാക്കട: സംസ്ഥാനത്തെ മികച്ച എ പ്ലസ് ഗ്രന്ഥശാലയായി തിരഞ്ഞെടുക്കപ്പെട്ട പൂഴനാട് ഭാവന ഗ്രന്ഥശാല ആൻഡ് കലാ സാംസ്കാരിക കേന്ദ്രത്തിന് ഉപഹാരം നൽകി. സി.കെ. ഹരിന്ദ്രൻ എം.എൽ എയുടെ അദ്ധ്യക്ഷതയിൽ ചേർന്ന യോഗത്തിൽ മന്ത്രി പ്രൊഫ.സി. രവിന്ദ്രനാഥ് ഭാവനയ്ക്ക് ഉപഹാരം സമ്മാനിച്ചു. ഭാവന ഭാരവാഹികളായ പൂഴനാട് ഗോപൻ, ഗംഗൻ, മണിദാസ്, ബിനു, പ്രദീപ് എന്നിവർ ഉപഹാരം ഏറ്റുവാങ്ങി. കഥാകാരൻ എം.വി. വേണുഗോപൻ, കവി മധുസൂദനൻ നായർ തുടങ്ങിയവർ പങ്കെടുത്തു.

തുടർച്ചയായി രണ്ടാംതവണയാണ് എ പ്ലസ് ഗ്രന്ഥശാലയായി ഭാവനയെ സംസ്ഥാന ലൈബ്രറി കൗൺസിൽ തെരെഞ്ഞെടുത്തത്. പാറശാല മണ്ഡലത്തിലെ ഏക എ പ്ലസ് ഗ്രന്ഥശാലയാണ്. താലൂക്കിലെയും ജില്ലയിലെയും മികച്ച ഗ്രന്ഥശാലയ്ക്കുള്ള പുരസ്കാരത്തിന് പുറമെ സംസ്ഥാനത്തെ മികച്ച ഗ്രന്ഥശാലയ്കുള്ള പുരസ്കാരവും ഭാവനയ്ക്ക് ലഭിച്ചിരുന്നു.