ആറ്റിങ്ങൽ: മാനവസേവ വെൽഫെയർ സൊസൈറ്റിയുടെ വാർഷികത്തോടനുബന്ധിച്ച് സൊസൈറ്റിയുടെ സ്ഥാപകരിൽ പ്രധാനിയായിരുന്ന ചലച്ചിത്രതാരം ഭരത് ഗോപിയുടെ സ്‌മരണാർത്ഥം ഏർപ്പെടുത്തിയ ഭരത് ഗോപി അവാർഡ് ചലച്ചിത്രതാരം വിനീതിന് സമ്മാനിക്കും. 25,001 രൂപയും ശില്പവും പ്രശസ്‌തിപത്രവും ഉൾപ്പെടുന്നതാണ് അവാർഡ്. ചലച്ചിത്ര രംഗത്തെ സമഗ്ര സംഭാവനകൾ പരിഗണിച്ചാണ് പുരസ്‌കാരം. മാനവസേവ പുരസ്‌കാരം സി.പി.എം ആറ്റിങ്ങൽ ഏരിയാ സെക്രട്ടറി അഡ്വ.എസ്. ലെനിന് നൽകും. 5001 രൂപയും ശില്പവും പ്രശസ്‌തിപത്രവും ഉൾപ്പെടുന്നതാണ് മാനവ സേവ പുരസ്‌കാരം. മാനവസേവ പ്രത്യേക ജൂറി പുരസ്‌കാരം സിനിമാതാരം ധന്യാമേരി വർഗീസിനും മാദ്ധ്യമ പുരസ്‌കാരം കേരളകൗമുദി ലേഖകൻ വിജയൻ പാലാഴിക്കും വൈദ്യശാസ്ത്ര പുരസ്‌കാരം മുദാക്കൽ ഗ്രാമപഞ്ചായത്ത് ഗവൺമെന്റ് ഹെൽത്ത് സെന്റർ ഡോ. ലക്ഷ്‌മി ജി.ജിക്കും, കർമ്മശ്രേഷ്ഠ പുരസ്‌കാരം സി.ഐ എസ്. ഷാജിക്കും, ഗുരുശ്രേഷ്ഠ പുരസ്‌കാരം അവനവഞ്ചേരി എച്ച്.എസ് അദ്ധ്യാപിക ഡി. ശരണ്യദേവിനും നൽകുമെന്ന് സൊസൈറ്റി പ്രസിഡന്റ് പൊയ്‌കമുക്ക് ഹരി,​ ജനറൽ സെക്രട്ടറി കെ. ശ്രീനിവാസൻ എന്നിവർ പത്രസമ്മേളനത്തിൽ പറഞ്ഞു. ചലച്ചിത്ര താരം മുകേഷ് ചെയർമാനായിട്ടുള്ള ജൂറിയാണ് അവാർഡിന് അർഹരായവരെ തിരഞ്ഞെടുത്തത്. അഡ്വ. കല്ലമ്പലം പി.ആർ. രാജീവ്,​ രഘുനാഥൻ എന്നിവരാണ് മറ്റ് ജൂറി അംഗങ്ങൾ. 29ന് വൈകിട്ട് 5ന് പൊയ്‌കമുക്ക് തിപ്പെട്ടി ദേവീക്ഷേത്ര ആഡിറ്റോറിയത്തിൽ നടക്കുന്ന ചടങ്ങിൽ മന്ത്രി സി. രവീന്ദ്രനാഥ് പുരസ്‌കാരങ്ങൾ വിതരണം ചെയ്യും.