വിഴിഞ്ഞം: ശാസ്ത്രത്തെ വിദ്യാർത്ഥി കേന്ദ്രീകൃതമാക്കി സമ്പന്നമാക്കുകയാണ് സർക്കാർ ലക്ഷ്യമെന്ന് മന്ത്രി സി. രവീന്ദ്രനാഥ്. അദാനി തുറമുഖ കമ്പനിയുടെ സാമൂഹ്യപ്രതിബദ്ധതാ പദ്ധതിയിലുൾപ്പെടുത്തി ഗവ. മുല്ലൂർ പനവിള സ്കൂളിൽ നിർമ്മാണം പൂർത്തീകരിച്ച 10 ക്ലാസ് മുറികളുള്ള ഇരുനില മന്ദിരത്തിന്റെ ഉദ്ഘാടനം നിർവഹിക്കുകയായിരുന്നു മന്ത്രി. മന്ത്രി രാമചന്ദ്രൻ കടന്നപ്പള്ളി അദ്ധ്യക്ഷത വഹിച്ച യോഗത്തിൽ എം. വിൻസെന്റ് എം.എൽ.എ മുഖ്യപ്രഭാഷണം നടത്തി.

നഗരസഭാ മേയർ അഡ്വ. വി.കെ. പ്രശാന്ത് വിശിഷ്ടാതിഥിയായി. അക്കാഡമിക്ക് മികവ് വർദ്ധിപ്പിക്കുന്നതിനായി 45000 വിദ്യാലയങ്ങളെ ഹൈടെക്ക് ആക്കുന്ന പ്രക്രിയയിൽ ആദ്യഘട്ടത്തിൽ തന്നെ ഗവ. യു.പി.സ്കൂളിനെ ഉൾപ്പെടുത്തുമെന്ന് മന്ത്രി ഉറപ്പു നൽകി. ജീവകാരുണ്യ പ്രവർത്തനങ്ങളോടൊപ്പം വിദ്യാഭ്യാസ പുരോഗതിക്കായി അദാനി തുറമുഖ കമ്പനി നടത്തുന്ന പ്രവർത്തനങ്ങൾ പ്രശംസനീയമാണെന്ന് മന്ത്രി പറഞ്ഞു. നഗരസഭ മേയർ വി.കെ. പ്രശാന്ത് സ്കൂളിന്റെ പ്രീ പ്രൈമറി വിഭാഗത്തിനാവശ്യമായ ഫർണിച്ചറുകൾ അടുത്ത പദ്ധതിയിൽ ഉൾപ്പെടുത്തി നൽകാമെന്ന് ഉറപ്പു നൽകി. വിഴിഞ്ഞം ഇന്റർനാഷണൽ സീ പോർട്ട് എം.ഡി ഡോ. ജയകുമാർ, തിരുവനന്തപുരം നഗരസഭ വിദ്യാഭ്യാസ സ്റ്റാൻഡിംഗ് കമ്മിറ്റി ചെയർമാൻ സി. സുദർശൻ, മുല്ലൂർ വാർഡ് കൗൺസിലർ സി. ഓമന, എസ്.എസ്.കെ. ഡിസ്ട്രിക്ട് പ്രോജക്ട് ഓഫീസർ ശ്രീകുമാരൻ, വിഴിഞ്ഞം പോർട്ട് കോർപറേറ്റ് ഹെഡ് സുശീൽ നായർ, സാമൂഹ്യപ്രതിബദ്ധത വിഭാഗം മേധാവി ഡോ. അനിൽ ബാലകൃഷ്ണൻ, പി.റ്റി.എ പ്രസിഡന്റ് വി.എൻ. അജി, സ്കൂൾ വികസന സമിതി ചെയർമാൻ വയൽക്കര ശശിധരൻ, ഹോവ്വേ സൈറ്റ് ഹെഡ് കേതൻ ദവ്വേ, സി.പി.എം. കോവളം ഏരിയാ സെക്രട്ടറി അഡ്വ. പി.എസ്. ഹരികുമാർ, ഡി.സി.സി ട്രഷറർ അഡ്വ. കെ.വി.അഭിലാഷ്, ബി.ജെ.പി മണ്ഡലം പ്രസിഡന്റ് ബി.രാധാകൃഷ്ണൻ, കോൺഗ്രസ് എസ് കോവളം മണ്ഡലം പ്രസിഡന്റ് ബി.രാജ്, സി.പി.ഐ ഏരിയാ സെക്രട്ടറി കാഞ്ഞിരംകുളം ഗോപാലകൃഷ്ണൻ, ജനതാദൾ മണ്ഡലം പ്രസിഡന്റ് തെന്നൂർക്കോണം ബാബു, മുൻ ഹെഡ്മാസ്റ്റർ രാജാമണി, പി.റ്റി.എ വൈസ് പ്രസിഡന്റ് എസ്.ലിജു, എം.പി.റ്റി.എ ചെയർപേഴ്സൺ ബി.എൻ.മിനിമോൾ, സ്റ്റാഫ് സെക്രട്ടറി എസ്.റ്റി ശിവകുമാർ, സ്കൂൾ ലീഡർ കുമാരി ആൻസി എന്നിവർ പ്രസംഗിച്ചു. തുറമുഖ കമ്പനിയുടെ സാമൂഹ്യപ്രതിബദ്ധതാ പദ്ധതിയിലുൾപ്പെടുത്തി നിർമ്മിക്കുന്ന രണ്ടാമത്തെ സ്കൂൾ മന്ദിരമാണ് മുല്ലൂർ ഗവൺമെന്റ് യു.പി സ്കൂളിലേത്.