ആ​റ്റിങ്ങൽ: തകർന്ന് കിടന്ന റോഡുകൾ വ്യാപാരികളുടെ നേതൃത്വത്തിൽ ഗതാഗത യോഗ്യമാക്കി. വ്യാപാരി വ്യവസായി സമിതി ആ​റ്റിങ്ങൽ യൂണി​റ്റാണ് റോഡിൽ പുനരുദ്ധാരണം നടത്തിയത്.

നഗരസഭയ്ക്ക് എതിർവശമുള്ള ദേശീയപാതയിൽ നിന്നും പാലസ് റോഡിലേക്കുള്ള സലഫി മസ്ജിദ് റോഡ് ഏറെക്കാലമായി തകർന്ന് കിടക്കുകയാണ്. ഈ വർഷത്തെ പദ്ധതിയിൽ ഉൾപ്പെടുത്തിയിട്ടുണ്ടെങ്കിലും മഴക്കാലം കഴിയാതെ പണി ആരംഭിക്കാനാകില്ലെന്ന നിലപാടിലാണ് അധികൃതർ. ഈ സാഹചര്യത്തിലാണ് വ്യാപാരി വ്യവസായി സമിതി നഗരസഭ ചെയർമാന്റെ അനുമതിയോടെ റോഡിലെ കുഴികൾ കോൺക്രീ​റ്റ് ചെയ്ത് ഗതാഗത യോഗ്യമാക്കിയത്.

തുടർന്നും നഗരപരിധിയിൽ റോഡുകൾ ഗതാഗത യോഗ്യമാക്കുന്നതുൾപ്പെടെയുള്ള സേവന പ്രവർത്തനങ്ങൾ വ്യാപാരി വ്യവസായി സമിതിയുടെ നേതൃത്വത്തിൽ നടത്തുമെന്ന് ഭാരവാഹികൾ അറിയിച്ചു. പ്രസിഡന്റ് ശശിധരൻ നായർ, സെക്രട്ടറി സി. ചന്ദ്രബോസ്, എൽ.എൽ. ഹുസൈൻ, ദിലീപ്, ബെന്നി മജസ്​റ്റിക്, ഭുവനചന്ദ്രൻ, ബിനു കളേഴ്‌സ്, നസീർ, അഭിലാഷ് എന്നിവർ നേതൃത്വം നൽകി.