വെഞ്ഞാറമൂട്: കേരളത്തിലെ ആഭ്യന്തര വകുപ്പിന്റെ നിയന്ത്രണം കൈവിട്ട അവസ്ഥയാണെന്ന് പാലോട് രവി അഭിപ്രായപ്പെട്ടു. കേന്ദ്ര സംസ്ഥാന സർക്കാരുകളുടെ ജനവിരുദ്ധ നയങ്ങൾക്കെതിരെ കെ.പി.സി.സി സംസ്ഥാന വ്യാപകമായി ആഹ്വാനം ചെയ്ത പഞ്ചായത്ത് ഓഫീസ് ധർണ മാണിക്കൽ ഗ്രാമപഞ്ചായത്തിനു മുന്നിൽ ഉദ്ഘാടനം ചെയ്യുകയായിരുന്നു അദ്ദേഹം. കഴിഞ്ഞ മൂന്ന് വർഷത്തിനിടെ നടന്നത് 29 രാഷ്ട്രീയ കൊലപാതകങ്ങളും ഏഴ് കസ്റ്റഡി മരണങ്ങളുമാണ്. കേരളത്തെ ഈ വിധം ശവപ്പറമ്പാക്കിയ ചരിത്രം മുൻപ് ഒരു കാലത്തും ഉണ്ടായിട്ടില്ലെന്നും അദ്ദേഹം കൂട്ടിച്ചേർത്തു. മുന്നുവർഷത്തിനിടയിൽ രണ്ടു തവണ വൈദ്യുതി ചാർജ് വർദ്ധിപ്പിച്ചു, കാരുണ്യ പദ്ധതി നിറുത്തലാക്കി തുടങ്ങിയ ജനദ്രോഹ നടപടികളിലൂടെ സംസ്ഥാന സർക്കാർ ജനങ്ങൾക്ക് ഒരു ബാദ്ധ്യതയായിരിക്കുകയാണെന്നും അദ്ദേഹം പറഞ്ഞു. പള്ളിക്കൽ നസീർ അദ്ധ്യക്ഷനായ യോഗത്തിൽ കോലിയക്കോട് മഹീന്ദ്രൻ, വെമ്പായം മനോജ്, തേക്കട അനിൽ, വെമ്പായം അനിൽ, എം.ആർ.സുകുമാരൻ നായർ, കോലിയക്കോട് അശോകൻ, വെമ്പായം ദാസ്, കരുപറമ്പിൽ ദാമോധരൻ തുടങ്ങിയവർ പങ്കെടുത്തു.