തിരുവനന്തപുരം: ദേശീയ നഗര ഉപജീവന ദൗത്യത്തിന്റെ (എൻ.യു.എൽ.എം) ഭാഗമായി നഗരപ്രദേശങ്ങളിലെ നിർദ്ധന യുവാക്കൾക്കായുള്ള സൗജന്യ തൊഴിൽ പരിശീലന പദ്ധതിയുടെ (ഇ.എസ്.പി.ടി)​ മൂന്നാം ഘട്ടം ആരംഭിച്ചു. സംസ്ഥാനത്ത് കുടുംബശ്രീ വഴിയാണ് പദ്ധതി നടപ്പാക്കുന്നത്.

93 നഗരങ്ങളിലെ 12,​000 പേർക്ക് പരിശീലനം നൽകാൻ 35 ഏജൻസികളുമായി കുടുംബശ്രീ ധാരണയിലെത്തി.

എട്ടാം ക്ലാസ്സ് മുതൽ ബിരുദം വരെ യോഗ്യതയുള്ള യുവതീയുവാക്കൾക്ക് വിവിധ കോഴ്‌​സുകളിൽ പരിശീലനം നേടാം. മൂന്നു മാസം മുതൽ എട്ടരമാസം വരെയാണ് കോഴ്സുകളുടെ കാലാവധി. വിജയകരമായി കോഴ്സ് പൂർത്തിയാക്കുന്നവർക്ക് എൻ.എസ്.ഡി.സി (നാഷണൽ സ്​കിൽ ഡവലപ്പ്‌​മെന്റ് കോർപ്പറേഷൻ) സർട്ടിഫിക്കറ്റ് ലഭിക്കും. തിരഞ്ഞെടുക്കപ്പെടുന്ന 5300 പേർക്ക് റസിഡൻഷ്യൽ രീതിയിൽ സൗജന്യ താമസ,​ ഭക്ഷണ സൗകര്യങ്ങളോടെ പരിശീലനം നേടാനാകും.

നഗരസഭകളിലെ കുടുംബശ്രീയുടെ സി.ഡി.എസ് ഓഫീസുകളിൽ നിന്നോ കുടുംബശ്രീ ദേശീയ നഗര ഉപജീവന ദൗത്യം ഓഫീസിൽ നിന്നോ 155330 എന്ന ടോൾഫ്രീ നമ്പരിലോ വിവരങ്ങൾ ലഭിക്കും. ഐ.ടി,​ ടെലികോം, ഓട്ടോമോട്ടീവ്, ടൂറിസം, അക്കൗണ്ടിംഗ്,​ ഇലക്ട്രോണിക്‌​സ്, ആയുർവേദം എന്നിങ്ങനെ വ്യത്യസ്ത മേഖലകളിലായി അക്കൗണ്ടന്റ്, ഫീൽഡ് എൻജിനീയർ- ഇലക്ട്രോണിക്‌​സ്, ആയുർവേദ സ്പാ തെറാപ്പിസ്റ്റ്, ജൂനിയർ സോഫ്ട്‌​വെയർ ‌ഡവലപ്പർ, ഫാഷൻ ഡിസൈനർ തുടങ്ങി 54 കോഴ്‌​സുകളിലാണ് പരിശീലന സൗകര്യം.