തിരുവനന്തപുരം: ഓൺലൈനായി വാങ്ങിയ ബിരിയാണിയിൽ പുഴു കണ്ടെത്തിയെന്ന പരാതിയെ തുടർന്ന് നഗരസഭ ആരോഗ്യ വിഭാഗം നടത്തിയ പരിശോധനയിൽ ഹോട്ടൽ അടപ്പിച്ചു. കവടിയാറിൽ പ്രവർത്തിക്കുന്ന ലാമിയ റസ്റ്റോറന്റാണ് നഗരസഭ നന്തൻകോട് ഹെൽത്ത് ഇൻസ്‌പെക്ടർ എസ്.എസ് മിനുവിന്റെ നേതൃത്വത്തിൽ നടത്തിയ പരിശോധനയിൽ പൂട്ടിച്ചത്. പരിശോധനയിൽ ബിരിയാണിയും വൃത്തിഹീനമായ സാഹചര്യത്തിൽ സൂക്ഷിച്ച കോഴി ഇറച്ചിയും പിടികൂടി. ഇന്നലെ വൈകിട്ട് 5.30ഓടെയായിരുന്നു പരിശോധന. പാചകം ചെയ്‌തതും അല്ലാത്തതുമായ ഇറച്ചി ഒരേ ഫ്രീസറിൽ സൂക്ഷിച്ചിരിക്കുന്നതായും പാചകം ചെയ്‌ത ഇറച്ചി പാത്രങ്ങൾ കഴുകുന്ന വാഷ്‌ബേസിന്റെ അടിയിൽ അലക്ഷ്യമായി സൂക്ഷിച്ചിരിക്കുന്നതായും പരിശോധനയിൽ കണ്ടെത്തി.